वजन कमी करण्यासाठी बदाम खाण्याची योग्य पद्धत आणि योग्य प्रमाण

हल्ली अनेक फिटनेसप्रेमी आपल्या दैनंदिन आहारात बदामाचा आवर्जून समावेश करत आहेत. प्रथिने, फायबर, व्हिटॅमिन ई, मॅग्नेशियम आणि आरोग्यदायी फॅट्सचा स्रोत असल्याने बदाम संतुलित आहाराचा महत्त्वाचा भाग मानला जातो. अनेकजण तो सकाळी भिजवून खातात, तर काहीजण स्मूदी, ओट्स, दही किंवा सॅलेडमध्येही बदामाचा वापर करतात.

वजन कमी करण्याचा प्रयत्न करणारे अनेकजण आपल्या आहारात बदामाचा समावेश करतात. बदामामध्ये प्रथिने, फायबर आणि आरोग्यदायी फॅट्स असल्यामुळे पोट अधिक वेळ भरल्यासारखे वाटण्यास मदत होऊ शकते, ज्यामुळे वारंवार भूक लागणे कमी होऊ शकते. मात्र, बदामामध्ये कॅलरीही तुलनेने जास्त असतात, त्यामुळे वजन कमी करण्यासाठी त्याचे योग्य प्रमाणात सेवन करणे, तसेच संतुलित आहार आणि नियमित व्यायामासोबत त्याचा समावेश करणे अधिक फायदेशीर ठरते.

दररोज किती बदाम खायला हवे?

सर्वसाधारण आरोग्यासाठी ५-८ बदाम दररोज खाऊ शकता. फिटनेस किंवा सक्रिय जीवनशैली असलेल्यांसाठी १५-२० बदाम खाऊ शकता. वजन कमी करण्याचा प्रयत्न करत असाल ८-१२ बदाम स्नॅक म्हणून खा. यामुळे पोट जास्त वेळ भरल्यासारखे वाटण्यास मदत होऊ शकते, पण एकूण कॅलरींचे प्रमाणही लक्षात ठेवणे आवश्यक आहे.

बदाम कसे खावे?

बदाम भिजवून खावेत की नाही याबाबत अनेकांच्या मनात संभ्रम असतो. प्रत्यक्षात भिजवलेले आणि न भिजवलेले दोन्ही प्रकारचे बदाम पौष्टिक असतात. भिजवलेले बदाम काही लोकांना पचायला अधिक सोपे वाटू शकतात आणि त्यांची साल सहज निघते; तर न भिजवलेल्या बदामांमध्येही तेच महत्त्वाचे पोषक घटक उपलब्ध असतात, त्यामुळे आपल्या पचनशक्ती, आवड आणि सोयीनुसार कोणत्याही प्रकारे बदाम खाऊ शकता. मात्र, त्यांचे सेवन नेहमी योग्य प्रमाणात आणि संतुलित आहाराचा भाग म्हणून करणे अधिक फायदेशीर ठरते.