उन्हाळ्यात कलिंगड खाण्याआधी कलिंगड खाण्याची योग्य पद्धत व वेळ जाणून घ्या…

कलिंगड खाण्याचे जबरदस्त फायदे

निर्जलीकरण टळते

कलिंगडामध्ये पाण्याचे प्रमाण भरपूर असते हे सर्वांनाच माहीत आहे. ते शरीराची पाण्याची गरज भागवते. ते केवळ डिहायड्रेशन टाळत नाही, तर शरीर थंड ठेवण्यासही मदत करते. उन्हाळ्यात आपल्या आहारात कलिंगडाचा नक्कीच समावेश केला पाहिजे.

पचनक्रिया निरोगी ठेवते

कलिंगडामध्ये फायबर भरपूर प्रमाणात असते, जे पचनसंस्था निरोगी ठेवण्यास मदत करते. तसेच, त्यामुळे बद्धकोष्ठता कमी होते आणि पोट हलके राहते.

वजन कमी करण्यास उपयुक्त

ज्यांना वजन कमी करायचे आहे त्यांच्यासाठी कलिंगड एक उत्तम पर्याय असू शकतो. त्यात कॅलरीज कमी आणि फायबरचे प्रमाण जास्त असते, ज्यामुळे पोट जास्त वेळ भरलेले राहते आणि वारंवार लागणारी भूक टाळता येते.

त्वचाही उजळ होते

कलिंगडामध्ये अँटीऑक्सिडंट्स आणि व्हिटॅमिन सी भरपूर प्रमाणात असते, यामुळे त्वचेची चमक टिकून राहण्यास मदत होते. तसेच ते त्वचेला आर्द्र ठेवते आणि सुरकुत्या कमी करण्यासही मदत करते.

हृदय निरोगी राहते

कलिंगडामध्ये लायकोपीन नावाचा पदार्थ असतो, जो हृदयाच्या आरोग्यासाठी फायदेशीर ठरतो. तसेच, तो कोलेस्ट्रॉलची पातळी नियंत्रित ठेवण्यास आणि रक्तदाब संतुलित राखण्यासही मदत करतो.

‘या’ गोष्टी लक्षात ठेवा

कलिंगड विकत घेतल्यानंतर ते थोडा वेळ पाण्यात भिजवून ठेवा. कापल्यानंतर ते जास्त काळ साठवून ठेवू नका. कलिंगडात ९० टक्क्यांहून अधिक पाणी असते, त्यामुळे ते खाल्ल्यानंतर पाणी, रस किंवा इतर पेये पिणे टाळा. याचा पचनक्रियेवर परिणाम होऊ शकतो.

कलिंगड खाण्याचा सर्वोत्तम मार्ग

कलिंगडामध्ये पाणी आणि फायबरचे प्रमाण जास्त असते, ते जास्त प्रमाणात खाल्ल्याने अतिसार, सूज येणे, पोट फुगणे यांसारख्या समस्या उद्भवू शकतात. याबरोबरच कलिंगड जेवणाबरोबर खाऊ नये.

कलिंगड खाण्याची सर्वोत्तम वेळ

कलिंगड खाण्याची सर्वोत्तम वेळ सकाळी १० ते दुपारी १२ पर्यंत आहे, कारण ही वेळ नाश्ता आणि दुपारच्या जेवणाच्या मध्ये येते. तुम्ही संध्याकाळी ५ वाजण्यापूर्वी नाश्ता म्हणूनही खाऊ शकता. रात्री किंवा जेवणाबरोबर कलिंगड खाऊ नये.