Disease Signs on Eyes: डोळे हा आपल्या शरीराचा एक अत्यंत महत्त्वाचा भाग आहे; त्यांच्याशिवाय पाहणे अशक्य असते, म्हणूनच डोळ्यांच्या आरोग्याची विशेष काळजी घेणे अत्यंत आवश्यक आहे. डोळ्यांशी संबंधित विविध समस्या या काही अंतर्गत आजारांची लक्षणेही असू शकतात. या समस्यांचे पूर्णपणे निवारण करण्यासाठी, त्यांच्या मूळ कारणांवर उपाय करणे गरजेचे आहे. डोळ्यांच्या या १० सामान्य समस्या कोणत्या आजारांचे संकेत असू शकतात ते येथे जाणून घ्या.
डोळ्यांतून दिसणारी आजारपणाची लक्षणे
डोळ्यांचा पांढरा भाग पिवळा पडणे
जर डोळ्यांचा पांढरा भाग पिवळा पडू लागला तर ते यकृत, पित्ताशय किंवा स्वादूपिंड यांच्याशी संबंधित समस्येचे लक्षण असू शकते.
अस्पष्ट दृष्टी
जर तुम्हाला डोळ्यांसमोर धुरकट पडदा आल्यासारखे वाटत असेल किंवा दृष्टी अस्पष्ट झाली असेल, तर हे मधुमेहाचे सुरुवातीचे लक्षण असू शकते. उच्च रक्तदाबामुळेही अशी स्थिती उद्भवू शकते.
बुबुळाभोवती पांढऱ्या रंगाचे वलय तयार होणे
जर डोळ्यांच्या बुबुळाभोवती पांढऱ्या किंवा करड्या रंगाचे वलय तयार झाले, तर ते वाढत्या वयामुळे असू शकते. तसेच हे उच्च कोलेस्ट्रॉल आणि ट्रायग्लिसराइडची वाढलेली पातळी दर्शवणारे लक्षणही आहे.
डोळे फडफडणे
जर पापण्या सतत फडफडत असतील तर त्याचे कारण चहा किंवा कॉफीचे अतिसेवन, मज्जासंस्थेचा थकवा किंवा अपुरी झोप हे असू शकते.
डोळे बाहेर आल्यासारखे वाटणे
डोळे बाहेरच्या दिशेने येत आहेत किंवा असामान्यपणे मोठे दिसत आहेत असे वाटणे, हे ‘हायपरथायरॉईडीझम’चे लक्षण असू शकते. थायरॉईड ग्रंथी अतिसक्रिय झाल्यामुळे ही स्थिती उद्भवते.
वारंवार येणारी रांजणवाडी
वारंवार रांजणवाडी होणे (पापणीवर वेदनादायक गाठ येणे) हे कमकुवत रोगप्रतिकारक शक्तीचे लक्षण असू शकते. बद्धकोष्ठता आणि पचनाच्या समस्यांमुळेही असे होऊ शकते.
डोळे कोरडे पडणे
डोळे वारंवार कोरडे पडणे आणि त्यांची जळजळ होणे या समस्या अनेकदा ‘स्क्रीन टाइम’ जास्त असल्यामुळे म्हणजेच मोबाईल फोन किंवा संगणकाचा गरजेपेक्षा जास्त वापर केल्यामुळे निर्माण होतात.
डोळ्यांसमोर विविध आकार तरंगताना दिसणे
दृष्टीच्या कक्षेत काळे ठिपके, धागे किंवा जाळ्यासारखे आकार तरंगताना दिसण्याच्या स्थितीला ‘फ्लोटर्स’ असे म्हणतात. जर असे आकार प्रमाणाबाहेर दिसत असतील, तर ते ‘रेटिनल डिटॅचमेंट’चे (म्हणजेच डोळ्याच्या पडद्याला तडा जाणे किंवा तो निखळणे) लक्षण असू शकते.
पापण्यांवर पिवळसर डाग किंवा गाठी तयार होणे
डोळ्यांच्या आसपास किंवा पापण्यांवर लहान गाठी दिसण्याच्या स्थितीला ‘झँथेलॅस्मा’ असे म्हणतात. शरीरातील ‘वाईट’ कोलेस्ट्रॉलची पातळी वाढल्यामुळे ही समस्या उद्भवू शकते.
रात्रीच्या वेळी कमी दिसणे
जर तुमची दृष्टी कमकुवत होत असेल किंवा संध्याकाळच्या वेळी तुम्हाला स्पष्ट दिसण्यास त्रास होत असेल, तर हे ‘व्हिटॅमिन ए’च्या कमतरतेचे लक्षण आहे. यावर वेळीच उपचार न केल्यास, कालांतराने अंधत्व येऊ शकते.
