पावसाळ्यात रात्री झोपण्यापूर्वी हळदीचं दूध का प्यावं? शरीरात दिसतील ‘हे’ बदल; कोणी प्यावं, कोणी नाही? डॉक्टरांकडून जाणून घ्या

एम्सचे माजी सल्लागार आणि साओल हार्ट सेंटरचे संस्थापक व संचालक डॉक्टर बिमल झज्जर यांच्या मते हळदीचे दूध, फार पूर्वीपासून घरगुती उपाय म्हणून ओळखले जाते. सर्दी, वारंवार होणारे आजार आणि शरीरावरील सूज यासाठी खूप फायदेशीर मानले जाते. पण, त्याचे सेवन योग्य प्रमाणात आणि योग्य पद्धतीने करणे महत्त्वाचे आहे. लोक अनेकदा हळदीचे दूध बनवण्यासाठी त्यात काळी मिरी, दालचिनी आणि आले घालतात. हळद आणि काळी मिरी एकत्र घेतल्यास हळदीतील कर्क्युमिन शरीराला अधिक चांगल्या प्रकारे शोषून घेण्यास मदत होऊ शकते.

हळदीचे दूध पिण्याचे फायदे

कर्क्युमिनमध्ये दाह कमी करण्याचे आणि शरीरातील हानिकारक घटकांपासून पेशींचे संरक्षण करण्याचे गुणधर्म आहेत. शरीरात तयार होणारे फ्री रॅडिकल्स पेशींना नुकसान पोहोचवू शकतात. हळदीतील अँटीऑक्सिडंट गुणधर्म या नुकसानीपासून पेशींचे संरक्षण करण्यास मदत करू शकतात. त्यामुळे हळद शरीराच्या रोगप्रतिकारक शक्तीला आधार देण्यास आणि आरोग्य चांगले ठेवण्यास मदत करू शकते. हळदीचे दूध घेताना साधारणपणे ½ ते १ चमचा हळद पुरेशी मानली जाते.

पावसाळ्यात हळदीचे दूध प्यायल्यास कसा परिणाम होतो?

पावसाळ्यात संसर्ग, सर्दी, घशाच्या समस्यांचा धोका वाढतो. त्यामुळे, काही लोकांसाठी मर्यादित प्रमाणात हळदीचे दूध पिणे फायदेशीर ठरू शकते. हळदीतील कर्क्युमिनमध्ये दाहशामक आणि अँटीऑक्सिडंट गुणधर्म असतात, तर कोमट दूध घशाला आराम देण्यास मदत करू शकते. हळदीमधील अँटीऑक्सिडंट आणि दाहशामक गुणधर्म शरीराच्या प्रतिकारशक्तीला आधार देतात आणि आजारांपासून संरक्षण करतात. रात्री कोमट दूध प्यायल्याने काही लोकांना अधिक आराम वाटू शकतो आणि त्यांची झोप सुधारू शकते. कोमट हळदीचे दूध घशातील खवखव कमी करण्यासही मदत करू शकते. जर तुम्हाला ताप, तीव्र खोकला किंवा संसर्ग झाला असेल. तर तुमच्या समस्येवर दुधाने उपचार करू नका; त्याऐवजी वैद्यकीय सल्ला घ्या.

कोणी हळदीचे सेवन सावधगिरीने करावे?

पावसाळ्यात, काही लोकांची पचनक्रिया मंदावू शकते, ज्यामुळे गॅस, अपचन, पोट फुगण्याचा त्रास होऊ शकतो. जर तुम्हाला आधीपासूनच पोटाच्या किंवा आतड्यांच्या समस्या असतील. तर जास्त प्रमाणात हळदीचे सेवन केल्याने अस्वस्थता वाढू शकते. याव्यतिरिक्त, पित्ताशयातील खडे किंवा इतर आजारांनी ग्रस्त असलेल्या लोकांनी देखील हळदीचा वापर सावधगिरीने करावा. हळदीमुळे पित्ताचा स्राव वाढू शकतो, ज्यामुळे काही रुग्णांमध्ये लक्षणांचा धोका वाढू शकतो. म्हणून अशा परिस्थितीत नियमितपणे किंवा जास्त प्रमाणात हळद घेण्यापूर्वी डॉक्टरांचा सल्ला घेणे उत्तम आहे. ज्यांना हळदीची ऍलर्जी आहे किंवा ज्यांना वारंवार आम्लपित्त, गॅस किंवा पोटाचे विकार जाणवतात, त्यांनी आणि गर्भवती किंवा स्तनपान करणाऱ्या महिलांनी देखील नियमितपणे किंवा मोठ्या प्रमाणात हळद घेण्यापूर्वी डॉक्टरांचा सल्ला घ्यावा किंवा डॉक्टरांचा सल्ला घेतल्याशिवाय हळदीचे सेवन करू नये.