Uric Acid avoid food: आजच्या काळात आहाराच्या चुकीच्या सवयी, शारीरिक हालचालींचा अभाव आणि अनियमित दिनचर्या हे बहुतांश लोकांच्या जीवनशैलीचा भाग बनले आहेत. परिस्थिती इतकी खालावली आहे की, तरुणांमध्ये अशा आरोग्यविषयक समस्या उद्भवत आहेत, ज्या पूर्वी केवळ वृद्ध व्यक्तींमध्येच दिसून येत असत. या समस्यांपैकी एक प्रमुख समस्या म्हणजे ‘युरिक ॲसिड’ची वाढलेली पातळी; भारतातील तरुणांमध्ये ही समस्या वेगाने वाढत आहे. युरिक ॲसिडची पातळी वाढल्याने आरोग्याच्या विविध समस्या उद्भवतात; यामध्ये सांधेदुखी आणि सूज येणे या सर्वांत सामान्य समस्या आहेत. जर तुम्हाला युरिक ॲसिडच्या वाढीबद्दल चिंता वाटत असेल किंवा तुम्हाला आधीच त्याच्याशी संबंधित समस्या जाणवत असतील, तर शरीरातील युरिक ॲसिड वाढण्यास कारणीभूत ठरणारे घटक या लेखात स्पष्ट केले आहेत.
युरिक ॲसिड म्हणजे काय? आणि त्यामुळे समस्या का निर्माण होतात?
युरिक ॲसिडची पातळी वाढण्यामागची कारणे समजून घेण्यापूर्वी, युरिक ॲसिड नक्की काय आहे हे जाणून घेणे आवश्यक आहे. युरिक ॲसिड हा शरीरात तयार होणारा एक नैसर्गिक टाकाऊ पदार्थ आहे; ‘प्युरिन’ नावाच्या घटकाचे विघटन झाल्यावर तो तयार होतो. तुम्हाला कदाचित माहीत नसेल, पण प्युरिन आपल्या शरीरात नैसर्गिकरित्या असते आणि ते काही विशिष्ट खाद्यपदार्थांमध्येही आढळते. सामान्यतः मूत्रपिंडे युरिक ॲसिड गाळून लघवीद्वारे शरीराबाहेर टाकतात. मात्र, जेव्हा शरीरातील युरिक ॲसिडची पातळी सामान्य प्रमाणापेक्षा वाढते किंवा मूत्रपिंडे ते प्रभावीपणे बाहेर टाकण्यास असमर्थ ठरतात, तेव्हा ते रक्तात साचू लागते. कालांतराने त्याचे स्फटिक तयार होऊन ते सांध्यांमध्ये जमा होऊ शकतात; ज्यामुळे तीव्र वेदना, सूज आणि सांधे आखडणे यांसारखे त्रास उद्भवतात.
शरीरातील युरिक ॲसिडची पातळी वाढण्यास कारणीभूत ठरणारे घटक
शरीरातील युरिक ॲसिडची पातळी वाढण्यामागे अनेक कारणे असू शकतात आणि उत्तम आरोग्य राखण्यासाठी ती समजून घेणे अत्यंत महत्त्वाचे आहे. ‘रेड मीट’चे (लाल मांस) विशेषतः यकृत आणि मूत्रपिंड यांसारख्या अवयवांच्या मांसाचे तसेच सी-फूडचे (समुद्री खाद्यपदार्थांचे) अतिसेवन युरिक ॲसिडची पातळी वाढवू शकते. याव्यतिरिक्त, मद्यपान आणि गोड पेयांचे विशेषतः फ्रक्टोजयुक्त सॉफ्ट ड्रिंक्स आणि पॅकबंद ज्यूसचे सेवनदेखील युरिक ॲसिडची पातळी वाढण्यास कारणीभूत ठरू शकते. जर तुम्ही कमी पाणी पीत असाल, क्वचितच व्यायाम करत असाल आणि दीर्घकाळ बसून काम करत असाल, तर युरिक ॲसिडची पातळी वाढण्याचा धोका कायम राहतो.
युरिक ॲसिड कसे कमी करावे?
जर तुम्हाला तुमच्या शरीरातील युरिक ॲसिडची पातळी कमी करायची असेल तर तुम्हाला तुमच्या दैनंदिन दिनचर्येत योग्य बदल करणे आवश्यक आहे.
- लाल मांस, अति प्रमाणात सी-फूड (समुद्री खाद्यपदार्थ) खाणे टाळा.
- डॉक्टरांच्या सल्ल्यानुसार आपल्या आहारात भाज्या, फळे आणि संपूर्ण धान्य यांचा समावेश करा.
- काकडी, पपई आणि सफरचंद यांसारखी फळे युरिक ॲसिडशी संबंधित समस्यांवर आराम मिळवण्यासाठी फायदेशीर मानली जातात; तुम्ही त्यांचा आहारात समावेश करू शकता.
- साखरयुक्त पदार्थ आणि पॅकेज केलेल्या पेयांचे सेवन शक्य तितके कमी करा; त्याऐवजी नारळ पाणी किंवा लिंबू पाण्यासारखे आरोग्यदायी पर्याय निवडा.
- तुमच्या दैनंदिन दिनचर्येत २०-३० मिनिटांच्या हलक्या व्यायामाचा जसे की सायकलिंग, चालणे किंवा योगा समावेश करा.
- जर तुम्ही मद्यपान करत असाल तर आजपासूनच ते कमी करा किंवा पूर्णपणे बंद करा.
- आइस्क्रीम आणि खोबरेल तेल, चेरी ज्यूस व्यतिरिक्त फळांचे रस, विशिष्ट प्रकारचे सीफूड, जसे की शेलफिश, अँकोव्हीज आणि ट्यूना हे खाणे टाळा
