White Discharge Diet To Avoid : व्हाइट डिस्चार्ज ( पांढरे पाणी जाणे) ही अनेक महिलांमध्ये आढळणारी एक अत्यंत सामान्य, परंतु तितकीच संवेदनशील समस्या आहे. अनेकदा महिला या समस्येकडे दुर्लक्ष करतात. मात्र, आरोग्य तज्ज्ञांच्या मते, वजायनल डिस्चार्ज हा केवळ एक साधा शारीरिक बदल नसून, तो शरीराच्या आत होत असलेल्या संप्रेरकांच्या (Hormones) असंतुलनाचा महत्त्वाचा संकेत असू शकतो.
रोजची जीवनशैली आणि विशेषतः खाण्यापिण्याची सवय याचा थेट संबंध स्त्री आरोग्याशी असतो. आपण जे अन्न खातो, ते आपल्या शरीरातील ‘pH लेव्हल’, उष्णता, ओलावा आणि सूक्ष्मजीवांच्या (बॅक्टेरिया व फंगस) वाढीवर थेट परिणाम करते. अयोग्य किंवा शरीराला न मानवणाऱ्या पदार्थांचे अतिसेवन केल्यास पांढऱ्या पाण्याचा त्रास कमी होण्याऐवजी अधिक गंभीर रूप धारण करू शकतो. त्यामुळे औषधोपचारांसह दैनंदिन आहारात योग्य आणि सकारात्मक बदल करणे अत्यंत गरजेचे ठरते. न्यूट्रिशनिस्ट राजमणि पटेल (मिस हर्ब) यांनी सांगितल्यानुसार, अशा परिस्थितीत नक्की कोणत्या पदार्थांपासून दूर राहावे, हे सविस्तर जाणून घेऊया.
‘या’ ५ गोष्टी खाणे टाळा:
१. अननस (Pineapple): अननस अतिशय ॲसिडिक (आम्लयुक्त) असते, ज्यामुळे शरीरात उष्णता वाढू शकते. यामुळे वजायनल डिस्चार्ज वाढण्याची आणि जळजळ किंवा खाज येण्याची शक्यता असते.
२. मशरूम (Mushroom): मशरूम हा एका प्रकारचा बुरशीजन्य पदार्थ आहे. हे शरीरात यीस्ट (कॅंडिडा) ची वाढ वाढवू शकते, ज्यामुळे वजायनल इन्फेक्शन वाढण्याचा धोका असतो. जर तुम्हाला आधीच यीस्ट इन्फेक्शन असेल तर मशरूम खाणे टाळावे.
३. कोबी आणि फ्लॉवर (Cabbage and Cauliflower): या भाज्या थंड असतात. यामुळे शरीरात सूज, डिस्चार्ज वाढणे, तसेच गॅस आणि पोट फुगण्याची (ब्लोटिंग) समस्या होऊ शकते.
४. भोपळा (Pumpkin): भोपळा शरीरातील ओलावा वाढवतो. त्यामुळे काही महिलांमध्ये पांढरे पाणी जाण्याची समस्या वाढू शकते.
५. लवंग (Clove): लवंग हा अतिशय उष्ण मसाला आहे. जास्त प्रमाणात लवंग खाल्ल्याने वजायनल pH बॅलन्स बिघडू शकतो, ज्यामुळे जळजळ, अस्वस्थता आणि इन्फेक्शन वाढण्याचा धोका असतो.
व्हाइट डिस्चार्ज नियंत्रित करण्यासाठी सोप्या टिप्स:
- दिवसभरात भरपूर पाणी प्या.
- आहारात प्रोबायोटिक फूड्सचा (उदा. दही) समावेश करा.
- जास्त गोड आणि जंक फूड खाणे टाळा.
- वैयक्तिक स्वच्छतेची (Personal Hygiene) विशेष काळजी घ्या.
