जिमला जाण्याची गरज नाही! बसून काम करणाऱ्यांनी मिलिंद सोमण यांचा हा ‘एक मिनिटाचा’ फॉर्म्युला नक्की वापरा

नॅचरलटीन (Naturaltein) पॉडकास्टमध्ये बोलताना ६० वर्षीय मिलिंद सोमण यांनी सांगितले की, “तुम्ही बसू नका. शक्य तितका वेळ आपल्या पायावर उभे राहण्याचा प्रयत्न करा. दर अर्ध्या तासाला आपल्या जागेवरून उठा, पाणी पिण्यासाठी लांब जा. आपल्या टेबलावर पाण्याची बाटली ठेवू नका. म्हणजे तुम्हाला उठून जावे लागेल.”

हालचाल हीच आरोग्याची गुरुकिल्ली

मिलिंद सोमण पुढे सांगतात की, “स्वतःला सुधारण्याची संधी शोधा. जर तुमची दुपारच्या जेवणाचा ब्रेक एक तासाचा असेल, तर त्यातील फक्त एक मिनिट स्वतःसाठी काढा. पुश-अप्सचा एक सेट करा, जागीच मार्चिंग करा किंवा तुम्हाला सुचेल ती हालचाल करा. शरीराची हालचाल होणे महत्त्वाचे आहे.”

तज्ज्ञ काय म्हणतात?

मिलिंद सोमण यांच्या या सल्ल्याला वैद्यकीय तज्ज्ञांनीही दुजोरा दिला आहे. मुंबई सेंट्रल वोक्हार्ट हॉस्पिटल्समधील वरिष्ठ अस्थिरोग तज्ज्ञ डॉ. गझनफर बी. पटेल यांनी दि इंडियन एक्सप्रेसशी बोलताना सांगितले की, दीर्घकाळ बसून राहणे हे आधुनिक जीवनशैलीतील सर्वात मोठे आरोग्य संकट आहे.

बसून राहण्याचे तोटे

सतत बसल्यामुळे पाठीचा कणा एकाच स्थितीत राहतो. तसंच स्नायू ताठ होतात, रक्ताभिसरण मंदावते आणि पोटाचे स्नायू शिथिल होतात. यामुळे पाठदुखी, मानदुखी आणि सांध्यांच्या समस्या उद्भवू शकतात.

३० मिनिटांचा नियम

दर ३० मिनिटांनी उठून थोडे चालल्यामुळे पाठीच्या कण्यावरील ताण कमी होतो आणि स्नायूंना विश्रांती मिळते.

मायक्रो-मूव्हमेंट्स

तासाभरात केलेली एक-दोन मिनिटांची हालचाल उदा. स्क्वॅट्स किंवा वॉल पुश-अप्स देखील शरीरासाठी फायदेशीर ठरते.

पोश्चर (बसण्याची पद्धत) किती महत्त्वाचे?

डॉ. पटेल यांनी सांगितल्याप्रमाणे, स्क्रीन डोळ्यांच्या पातळीवर असणे आणि पाठ सरळ ठेवून बसणे आवश्यक आहे. मात्र ते पुढे स्पष्ट करतात की, “कोणतीही बसण्याची स्थिती कितीही चांगली असली, तरी ती दीर्घकाळ ठेवणे सुरक्षित नाही. शरीर निरोगी ठेवण्यासाठी ‘मूव्हमेंट’ म्हणजेच हालचाल करणे हाच सर्वोत्तम उपाय आहे.”

यासाठी काही टिप्स

• पाणी पिण्यासाठी उठून जा, बाटली जवळ ठेवू नका.
• लिफ्टऐवजी पायऱ्यांचा वापर करा.
• फोनवर बोलताना चालत बोला.
• लंच ब्रेक दरम्यान किमान २ मिनिटे स्ट्रेचिंग करा.