दिवसभर सतत जांभई येते? मग शरीरात लपलाय ‘हा’ गंभीर आजार; साधा आळस समजून दुर्लक्ष करू नका, डॉक्टरांची धक्कादायक माहिती…

विशाखापट्टणम येथील गायत्री हॉस्पिटलचे वरिष्ठ जनरल फिजिशियन डॉ. के. व्ही. राम कुमार यांच्या मते, सतत जांभई येण्यामागील सर्वात सामान्य कारणे म्हणजे पुरेशी झोप न मिळणे, जास्त वेळ काम करणे आणि शारीरिक किंवा मानसिक थकवा. मेंदूला पुरेशी विश्रांती मिळाली नाही तर तो शरीराला जांभई येण्याचे संकेत देतो. आरोग्य तज्ज्ञांच्या मते, चांगल्या आरोग्यासाठी प्रौढ व्यक्तींनी दररोज ७ ते ९ तास झोप घेणे आवश्यक आहे.

मात्र, झोपेची कमतरता हेच एकमेव कारण नाही. डॉ. राम कुमार सांगतात की, सतत जांभई येणं हे लोहाची कमतरता, अशक्तपणा (ॲनिमिया), थायरॉईडचा त्रास, मधुमेह आणि स्लीप ॲप्निया यांसारख्या आजारांशीही संबंधित असू शकते. काही लोकांमध्ये काही औषधांच्या दुष्परिणामांमुळेही वारंवार जांभई येऊ शकते. त्यामुळे इतर आरोग्याच्या तक्रारींसोबत हे लक्षण दिसत असेल तर त्याकडे दुर्लक्ष करू नये, असा डॉक्टरांचा सल्ला आहे.

जर सतत जांभई येण्यासोबत खूप थकवा जाणवत असेल, चक्कर येत असेल, श्वास घेण्यास त्रास होत असेल, हृदयाचे ठोके वेगाने वाढत असतील किंवा लक्ष केंद्रित करण्यात अडचण येत असेल, तर त्वरित डॉक्टरांचा सल्ला घ्यावा. रक्त तपासणी आणि इतर आवश्यक तपासण्यांद्वारे यामागील नेमकं कारण शोधून योग्य वेळी उपचार करता येतात.

डॉक्टरांच्या मते, काही सोप्या जीवनशैलीतील बदलांमुळेही सतत जांभई येण्याची समस्या कमी होऊ शकते. पुरेशी झोप घेणे, वेळेवर संतुलित आहार घेणे, भरपूर पाणी पिणे, नियमित व्यायाम करणे आणि तणाव कमी ठेवणे या गोष्टी महत्त्वाच्या आहेत. तसेच लोह आणि आवश्यक जीवनसत्त्वांनी भरपूर आहार घेतल्यास, पोषणाच्या कमतरतेमुळे होणारी ही समस्या कमी होण्यास मदत होऊ शकते.

अधूनमधून जांभई येणं पूर्णपणे सामान्य आहे आणि त्याबद्दल काळजी करण्याचं कारण नसतं. मात्र, कोणतंही स्पष्ट कारण नसताना दिवसभर सतत जांभया येत असतील आणि त्यासोबत इतर लक्षणेही दिसत असतील, तर दुर्लक्ष न करता डॉक्टरांचा सल्ला घ्यावा. कारण वेळेत कारण शोधून उपचार केल्यास पुढे होणाऱ्या गंभीर आरोग्य समस्यांपासून बचाव होऊ शकतो.

(Disclaimer: वरील माहिती प्राप्त माहितीवर आधारित असून अधिक माहितीसाठी तज्ज्ञ/डॉक्टरांचा सल्ला घ्यावा.)