बालमैफल : गुण घेईन आवडी! : एक तरी गुण घ्यावा

निसर्ग अनेक गोष्टी दाखवत असतो त्या पाहा... अनेक गोष्टी सांगत असतो त्या ऐका...आणि अनेक गोष्टी करत असतो त्या अनुभवा... या सर्वांसाठी दृष्टी श्रुती देणारं सदर

balmaifal-gun-ghan-awadi-learning-from-nature

निसर्गाकडे बारकाईने पाहायला शिकवणारा ‘गुण घेईन आवडी’ बालमैफल लेख (छायाचित्र:लोकसत्ता टीम)

बालदोस्तांनो, आम्ही मालवणी माणसं बोलताबोलता सहजच म्हणतो, ‘‘तेचा काय इशेश नाय, ता सदीचाच आसा.’’ सदीचा म्हणजे नेहमीचा. जे नेहमीचंच असतं, त्याचं काही विशेष नाही, असा त्याचा थोडक्यात अर्थ. मी मालवणी असल्यानं माझ्या भाषेतील हे वाक्य मला चटकन सुचलं एवढंच. एकंदर जगातल्या खूप साऱ्या माणसांची जे नेहमीचंच असतं ते फारसं विशेष नाही म्हणून त्याकडे दुर्लक्ष करायची वृत्ती असतेच. त्यात एखादाच कोणीतरी नेहमीच झाडावरून पडणारं सफरचंद बारकाईनं बघतो, नेहमी ते जमिनीवरच पडत असलं तरीही ते जमिनीवरच का पडतं? असा विचार करतो आणि तोच नंतर महान शास्त्रज्ञ न्यूटन म्हणून प्रख्यात होतो.

मित्रांनो, आपल्या आसपास अशा अगणित नैसर्गिक गोष्टी असतात- ज्या नेहमीच्याच असल्यानं आपण त्यांचा विचारच करत नाही, त्यांना गृहीत धरत असतो. तसं न करता आपण त्यांच्याकडे वैज्ञानिक, सामाजिक, भौगोलिक, मानसशास्त्रीय, भाषिक अशा वेगवेगळ्या दृष्टीनं पाहिलं तर? त्यांच्यातल्या गुणांचं निरीक्षण केलं आणि ते आपल्यात रुजवण्याचे प्रयत्न केले तर? ‘गुण घेईन आवडी!’ या सदरात आपण नेमकं हेच करणार आहोत.

वर्षभर निसर्गातल्या काही नेहमीच्याच गोष्टींचं निरीक्षण करणार आहोत. त्यांचे गुण टिपणार आहोत आणि त्यापासून आपल्याला काय घेता येईल याचा विचार करणार आहोत. म्हणजे या गोष्टींमधला एकतरी गुण घेतला तरी खूप झालं. आणि हो, हे केवळ मीच करणार नाही, तर तुम्हीही त्यात सहभागी होणार आहात. म्हणजे सदर वाचून फक्त पान उलटायचं नाही, तर निसर्गाकडे जरा बारकाईनं लक्ष द्यायचं आणि यात सामील व्हायचं… चला तर मग… आहात ना तयार!

joshimeghana.23@gmail.com

TOPICSबालमैफल Balmaifil

मराठीतील सर्व लोकरंग बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Balmaifal gun ghan awadi learning from nature rub