कल्याण-डोंबिवली महापालिकेचे आयुक्त शंकर भिसे यांची रविवारी तडकाफडकी बदली करण्यात आली असून त्यांचा पदभार ठाण्याचे अतिरिक्त आयुक्त श्यामसुंदर पाटील यांच्याकडे देण्यात आला आहे. आचारसंहितेच्या काळात स्थायी समितीची बैठक घेऊन त्यात दहा कोटी रुपयांची रस्त्यांची कामे मंजूर केली होती. या प्रकरणी मनसेच्या पदाधिकाऱ्याने जिल्हा निवडणूक अधिकाऱ्यांकडे तक्रार केल्याने भिसे काहीसे अडचणीत आले होते. त्यामुळे स्थायी समितीची वादग्रस्त बैठकच भिसे यांच्या तडकाफडकी बदलीस कारणीभूत ठरल्याची जोरदार चर्चा शहरात आहे.
