‘काँग्रेसमुक्त’ देशाची नरेंद्र मोदी यांची ‘महागर्जना’ देशभरात घुमल्यानंतर लोकसभा निवडणुकीच्या प्रचाराचा समारोप करण्यासाठी मोदी यांची ‘महायुती’ ची सभा सोमवारी मुंबईतील वांद्रे-कुर्ला संकुलात होत आहे. देशाची आर्थिक राजधानी असलेल्या मुंबईचे शांघाय, हाँगकाँग करण्याचे स्वप्न याआधी केंद्राकडून मुंबईकरांना दाखविले गेले. आता पंतप्रधानपदी आरूढ होण्याची आकांक्षा असलेले नरेंद्र मोदी मुंबईकरांना कोणती नवीन स्वप्ने दाखविणार आणि ती वास्तवात उतरविणार का, याविषयी मुंबईकरांच्या मनातील उत्सुकतेला उद्या होणाऱ्या जाहीर सभेतून वाट मिळणार आहे.
