इसिसशी संबंध असल्याच्या संशयावरून शनिवारी रिझवान खानला कल्याणमधून अटक केल्यानंतर आज परभणीतून आणखी एकाला याच संशयावरून अटक करण्यात आली आहे. इसिस या दहशतवादी संघटनेच्‍या संपर्कात असल्याच्या संशयावरुन परभणीतून शाहीद खानला महाराष्ट्र दहशतवाद विरोधी पथकाने अटक केली. मराठवाड्यातील तरुण मोठ्या प्रमाणात दहशतवादी होण्यासाठी इसिसच्या संपर्कात असल्याची माहिती एटीएसला मिळाली आहे. काही दिवसांपूर्वी एटीएसने परभणीतून नासेरबिन चाऊसला अटक केली होती. तो इसिसच्या संपर्कात असल्याचा संशय होता. नासेरबिन चाऊसच्या चौकशीतून शाहीद खानचे नाव समोर आल्याने ही कारवाई करण्यात आल्याची माहिती आहे. त्यानंतर आता एटीएसने परभणीतून शाहीद खान नावाच्या तरुणाला १ किलो स्फोटकांसह ताब्यात घेतले आहे.
