News Flash

गडचिरोली : खोब्रामेंढा जंगलात चकमकीत पाच नक्षलवाद्यांचा खात्मा

उत्तर गडचिरोली विभागीय समितीचा सचिव भास्कर देखील ठार

कुरखेडा पोलीस उपविभाग अंतर्गत येणाऱ्या पोलीस मदत केंद्र मालेवाडा हद्दीच्या खोब्रामेंढा जंगलात मागील दोन दिवसांपासून सुरू असलेल्या नक्षलवाद विरोधी अभियानात आज (सोमवार) सकाळी ७.३० ते ८ या वेळेत झालेल्या चकमकीत पाच नक्षलवादी ठार झाले.

यामध्ये नक्षलवाद्यांचा उत्तर गडचिरोली विभागीय समितीचा सचिव २५ लाखांचे बक्षीस असलेला जहाल नक्षली ऋषी रावजी उर्फ पवन उर्फ भास्कर हीचामी (४६), राजू उर्फ सुखदेव बुधेसिंग नेताम (३२), अमर मुया कुंजाम (३०), सुजाता उर्फ कमला उर्फ पूनिता गावडे (३८) व अस्मिता उर्फ सखलु पदा (२८) असे तीन पुरुष व दोन महिला नक्षलवाद्यांचा समावेश आहे. अशी माहिती गडचिरोलीचे पोलीस अधीक्षक अंकित गोयल यांनी पत्रकारपरिषदेत दिली.

सलग तीन दिवसांपासून या भागात सी 60 पथक अभियान राबवित आहे. शुक्रवार २७ मार्च पासून पोलीस आणि नक्षलवाद्यांमध्ये चकमकी सुरू आहेत. आतापर्यत तीन चकमकी झाल्या आहेत. शनिवारी सुमारे एक ते दीड तास चाललेल्या या चकमकीत पोलिसांचा वाढता दबाव पाहून नक्षलवादी घनदाट जंगलात पसार झाले. या चकमकीनंतर घटनास्थळावरून एके 47 सह चार बंदुका व मोठ्या प्रमाणात नक्षलवाद्यांचे साहित्य जप्त करण्यात आले.

तीन वेगवेगळ्या ठिकाणी चकमक
खोब्रामेंढा जंगलात नक्षलवादी मोठ्या प्रमाणात एकत्र आले असून, ते दरवर्षी नक्षलवाद्यांकडून पाळल्या जात असलेल्या टीसीओसी नक्षल सप्ताहाच्या पार्श्वभूमीवर घातपात करण्याची शक्यता असल्याची गोपनीय माहिती पोलीस अधीक्षक अंकित गोयल यांना मिळाली होती. यावर अपर पोलीस अधीक्षक (अभियान) मनीष कलवानीया, अप्पर पोलिस अधीक्षक समीर शेख, उपविभागीय पोलिस अधिकारी भाऊसाहेब ढोले यांच्या नेतृत्वाखाली खोब्रामेंढा, हेटाळकसा जंगल परिसरात गडचिरोली पोलीस दलातील सी-६० चे जवान नक्षलविरोधी अभियान राबवित असतांना शनिवार २८ रोजी सकाळी ७ वाजताच्या सुमारास जंगलात तीन वेगवेगळ्या ठिकाणी दबा धरून बसलेल्या ६० ते ७० नक्षलवाद्यांनी सी-६० जवानांना जीवे मारण्याच्या उद्देशाने जवानांच्या दिशेने गोळीबार केला. प्रत्युत्तरादाखल जवानांनी नक्षलवाद्यांच्या दिशेने गोळीबार केला. यावेळी सुमारे तासभर चाललेल्या चकमकीनंतर पोलिसांचा वाढता दबाव पाहून नक्षलवादी घनदाट जंगलाचा फायदा घेत घटनास्थळावरून पळून गेले.

दरम्यान, आजच्या चकमकीत पाच नक्षलवादी ठार झाले आहेत. या सर्व नक्षलवाद्यांवर ४३ लाखांचे बक्षीस होते. जहाल नक्षलवादी नर्मदाच्या अटकेनंतर उत्तर गडचिरोली विभागाची जबाबदारी भास्करकडे सोपविली होती. आता या चकमकीत तोच ठार झाल्याने चळवळीला जबर धक्का बसला आहे. या कारवाईबद्दल पोलीस अधीक्षक गोयल यांनी सी 60 पथकाचे कोतुक केले आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on March 29, 2021 8:36 pm

Web Title: 5 naxals killed in an encounter with security forces in khobra mendha forest area of kurkheda in gadchiroli msr 87
Next Stories
1 Beed Lockdown : बीडमध्ये लॉकडाऊन कालावधीत शिथिलता, धनंजय मुंडेंच्या प्रशासनाला सूचना!
2 कल्याण-डोंबिवली : दारू पिऊन धिंगाणा घालणाऱ्या ‘त्या’ कर्मचाऱ्यांचा महापालिकेशी संबंध नाही
3 पंढरपूर-मंगळवेढा पोटनिवडणुकीसाठी राष्ट्रवादी काँग्रेसचा उमेदवार जाहीर
Just Now!
X