अलिबाग येथील जिल्हा मध्यवर्ती कारागृहात करोनाने शिरकाव केला आहे. कारागृहातील कैदी व कर्मचारी मिळून एकूण ६९ जणांना करोनाची लागण झाली आहे. या सर्वांवर नेऊली येथील कोविड केअर सेंटरमध्ये उपचार सुरु करण्यात आले आहेत. अलिबाग मधील करोनाचा प्रादुर्भाव कमी होण्याची चिन्ह दिसत नाही. जिल्ह्यात सर्वाधिक करोना रुग्ण सध्या अलिबाग तालुक्यात आहेत. १ हजार २१२ करोनाबाधिंतावर उपचार सुरु आहेत. यात सोमवारी आणखी १०१ जणांची भर पडली आहे. चिंताजनक बाब म्हणजे यात जिल्हा मध्यवर्ती कारागृहातील कैदी व कर्मचाऱ्यांचा समावेश आहे. रविवारी जिल्हा मध्यवर्ती कारागृहातील कैद्यांची व कर्मचाऱ्यांची करोना चाचणी करण्यात आली होती. यामध्ये करोना पॉझिटिव्ह आढळलेल्या या सर्वांना नेऊली येथील कोविड केअर सेंटरमध्ये उपचारासाठी दाखल करण्यात आले. बहुतांश रुग्णांना करोनाची कुठलीही लक्षणं दिसून आलेली नाहीत. त्यांच्यावर जिल्हा रुग्णालयांतील वैद्यकीय अधिकाऱ्यांच्या देखरेखीत उपचार सुरु करण्यात आले आहेत, अशी माहिती अलिबागचे तहसीलदार सचिन शेजाळ यांनी दिली.
