नागपुरातील प्रकार, आरोपीला अटक नागपूर : कौटुंबिक आणि प्रेयसीचा खर्च यांची तोंडमिळवणी करण्यासाठी नागपुरातील एका शरीरसौष्ठवपटूने चक्क दरोडा टाकला. पोलिसांनी घरफोडीप्रकरणी दोघांना अटक केल्यानंतर हा प्रकार उजेडात आला. शरीरसौष्ठवपटू असलेल्या अफसर खान अख्तर खान (३१) याच्या भावाची महाल परिसरात व्यायामशाळा आहे. तो तेथे प्रशिक्षक होता. अफसर मुंबईमध्ये जानेवारीत होणाऱ्या मॉडेल फिजिक्स स्पर्धेत सहभागी होण्यासाठी तयारी करीत होता. त्याचे एका तरुणीशी विवाहबाह्य़ प्रेमसंबंध होते. जिममध्ये काम करून पत्नीसह आपले कुटुंब आणि प्रेयसी यांचा खर्च चालवणे त्याच्या आवाक्याच्या बाहेर गेले होते. त्यावर त्याने दरोडा टाकण्याची शक्कल लढविली. केंद्रीय सार्वजनिक बांधकाम विभागातून सेवानिवृत्त झालेले कालिचरण गुलजारीलाल टाकभवरे (६४) हे कुटुंबासह कुलू-मनालीला सहलीला गेले होते. ही संधी साधून अफसर खान आणि इरफान खान यांनी १२ नोव्हेंबरच्या मध्यरात्री टाकभवरे यांच्या घरावर दरोडा टाकला. त्यांनी कपाटातील १५ तोळे सोन्याचे दागिने, एलसीडी टीव्ही आणि ६० हजार रुपये चोरले. पोलिसांनी आरोपींना अटक करून त्यांच्याकडून सुमारे सहा लाखांचा मुद्देमाल जप्त केला.
