नालासोपारा शहरात काही तरुणांनी भर रस्त्यात तलवारीने एकावर हल्ला केल्याची चित्रफित सध्या सोशल मीडियावर व्हायरल झाली आहे. मित्राच्या भांडणात मध्यस्ती कऱण्यासाठी गेलेल्या एका तरुणांवर चौघांची तलवारीने हल्ला केला. तुळींज पोलिसांनी याप्रकऱणी एकाला अटक केली आहे. नालासोपारा पुर्वेच्या प्रगती नगरमध्ये सोमवार २९ जून रोजी ही घटना घडली होती. मात्र, त्याची चित्रफित सोशल मीडियावर आल्यानंतर घटनेचे गांभीर्य समोर आले. तुळींज पोलिसांच्या माहितीनुसार, संजय मिश्रा (वय २२) याचा मित्र सलमान याचे तीन मित्रांशी भांडण सुरू होते. ते सोडविण्यासाठी संजय मध्ये पडला. त्यामुळे सलीम, नूर आणि पप्पू या तीन आरोपींनी तलवारीने आणि बांबूने संजयवर हल्ला केला. त्यात तो जबर जखमी झाला. त्याला उपचारासाठी खाजगी रुग्णालयात दाखल करण्यात आले आहे. संजयच्या फिर्यादीवरून तुळींज पोलिसांनी चार आरोपींविरोधात हत्येचा प्रयत्न तसेच बेकायदेशीर शस्त्र बाळगल्याप्रकरणी गुन्हे दाखल केले आहेत. याप्रकरणी गुरूवारी एका आरोपीला अटक कऱण्यात आली असून अन्य तीन फरार आरोपींचा शोध सुरू आहे. हे सर्व आरोपी गुन्हेगारी प्रवृत्तीचे असून त्यांच्यावविरोधात यापूर्वी गुन्हे दाखल असल्याची माहिती तुळींज पोलीस ठाण्याचे वरिष्ठ पोलीस निरीक्षक दत्तात्रय पाटील यांनी दिली.
