'भावोजी' म्हणून महाराष्ट्रातील घराघरात पोहोचलेले अभिनेते आदेश बांदेकर यांच्या कारला कराड रोडवर अपघात झाल्याची माहिती समोर येत आहे. कोल्हापूरच्या दिशेने जात असताना हा अपघात झाला असून सुदैवाने ते या अपघातातून सुखरुप बचावले. आदेश बांदेकर हे सिद्धिविनायक मंदिराच्या विश्वस्त मंडळाचे अध्यक्ष असून मंदिराच्या वतीने एक कोटीचा धनादेश जिल्हाधिकाऱ्यांकडे सोपवण्यासाठी ते निघाले होते. यावेळी कारचा टायर फुटल्याने हा अपघात झाला. मात्र, सीटबेल्ट लावला असल्याने बांदेकर यांना कोणतीही दुखापत झाली नसून ते सुखरूप आहेत. यावेळी त्यांच्यासोबत सिद्धिविनायक मंदिराचे इतर विश्वस्तही होते. मात्र कोणालाही दुखापत झाली नाही. फक्त गाडीचे किरकोळ नुकसान झाले. गणपती बाप्पाच्या कृपेने या अपघातातून बचावलो, अशी प्रतिक्रिया त्यांनी वृत्तवाहिन्यांना दिलेल्या मुलाखतीत दिली.
