माडबन येथील जैतापूर अणुऊर्जा प्रकल्पाच्या विरोधात प्रखर लढा उभारलेले नेते प्रवीण गवाणकर (६०) यांचे गुरुवारी दीर्घ आजाराने निधन झाले. त्यांच्यामागे पत्नी, मुलगा व दोन मुली असा परिवार आहे. भूमिपुत्रांची संघटना बांधून गेली सात वष्रे या प्रकल्पाला विरोध करणारे गवाणकर गेल्या वर्षी कर्करोगाने आजारी होते. अणुऊर्जा महामंडळातर्फे माडबन येथे प्रकल्प उभारण्याचे निश्चित झाल्यानंतर गवाणकर यांनी २००६-०७ मध्ये माडबन जनहित सेवा समिती स्थापन करून स्थानिक भूमिपुत्रांचा प्रखर लढा उभा केला. शिवसेनेपासून कम्युनिस्टांपर्यंत सर्व विरोधी पक्षांचे नेते गवाणकर यांच्याच आधाराने या ठिकाणी येऊन आंदोलनामध्ये सहभागी होत असत. त्यांच्या नेतृत्वावर ग्रामस्थांचा प्रचंड विश्वास होता. पण गेल्या वर्षी कर्करोगग्रस्त झाल्यानंतर गवाणकरांची उमेद कमी होत गेली. त्यातूनच त्यांनी काही महिन्यांपूर्वी आंदोलनापासून दूर होत तडजोडवादी भूमिका स्वीकारली. मात्र प्रकल्पाला आपला विरोध असल्याचे त्याहीवेळी त्यांनी सांगितले होते.
