अमेरिकेतील पनामा येथे नुकतीच मिस टिन युनिव्हर्स २०१९ स्पर्धा पार पडली. या सौंदर्य स्पर्धेत अलिबागच्या अपूर्वा ठाकूर हिने भारताचे प्रतिनिधित्व केले. स्पर्धेत लक्षणीय कामगिरी बजावत तीने थर्ड रनर अपचा किताब पटकावला. या स्पर्धेत वेगवेगळ्या २८ देशातील सौंदर्यवती सहभागी झाल्या होत्या. यातील १६ जणींची उपांत्य फेरीत निवड करण्यात आली. अंतिम फेरीसाठी सहा स्पर्धकांची निवड झाली, ज्यात अपूर्वाचाही समावेश होता. चुरशीच्या फेरीत अपूर्वा मिस टिन युनिव्हर्स किताब पटकावण्यात अपयशी ठरली. मात्र स्पर्धेतील थर्ड रनर अपचा किताब तिनं पटकावला. ब्राझिल आणि मेक्सिकोच्या सौंदर्यवतींनी स्पर्धेवर वर्चस्व राखले. अपूर्वाला देशभरातून मोठय़ा प्रमाणावर पाठिंबा मिळाला होता. गेल्या वर्षी डिसेंबरमध्ये अपूर्वाने मिस टिन इंडिया युनिव्हर्सचा किताब २०१८ मध्ये जिंकला होता. अपूर्वा याबाबत प्रतिक्रिया देताना म्हणाली की मिस टिन युनिव्हर्स या जागतिक व्यासपीठावर आपल्या देशाचे प्रतिनिधित्व करायला मिळाले ही भाग्याची गोष्ट होती. सर्व भारतीयांच्या शुभेच्छा माझ्या पाठीशी होत्या. त्यामुळे मी चांगली कामगिरी करू शकले.
