औरंगाबादच्या घाटी रुग्णालयात एका २८ वर्षीय डॉक्टरने आत्महत्या केली आहे. डॉ. शेषाद्री गौडा असं या २८ वर्षीय डॉक्टरचं नाव आहे. मानसिक आजार असल्याच्या संशयातून त्यांनी इंजेक्शन घेऊन त्यांचं आयुष्य संपवलं आहे. डॉ. शेषाद्री गौडा हे गोल्ड मेडलिस्ट होते. त्यांनी आत्महत्या केल्याने एकच खळबळ उडाली आहे. शेषाद्री गौडा हे या विभागातले निष्णात डॉक्टर म्हणून परिचित होते. दरम्यान या ठिकाणी पोलीस दाखल झाले असून पुढील तपास आणि कायदेशीर प्रक्रिया ते करत आहेत. या घटनेनंतर हळहळ व्यक्त होते आहे. डॉक्टर गौडा यांनी विषारी रसायन इंजेक्शनद्वारे टोचून घेतलं. गौडा हे बेगमपुरा भागात वास्तव्यास होते. मनोविकार जडल्याच्या संशयातून त्यांनी आत्महत्या केली असा प्राथमिक अंदाज व्यक्त होतो आहे. गौडा यांची सुसाइड नोट पोलिसांनी ताब्यात घेतली आहे. मात्र या सुसाइड नोटमध्ये काय लिहिलं आहे ते स्पष्ट केलेलं नाही.