नववर्षाचा पहिला दिवस महाराष्ट्रासाठी दुख:द ठरला आहे. बीड आणि साताऱ्यातील असे दोन जवान कर्तव्यावर असताना शहीद झाले आहेत. पंजाबमधील भटिंडा येथे कर्तव्यावर असताना बीडमधील परळी तालुक्यातील लाडझरीचे जवान महेश यशवंत तिडके शहीद झाले. बुधवारी कर्तव्यावर असताना एका अपघातात महेश यांचा मृत्यू झाला. महेश यांच्या निधनाचे वृत्त समजताच परळी तालुक्यात शोककळा पसरली. गुरूवारी महेश यशवंत तिडके यांच्या पार्थिवावर लाडझरी येथे लष्करी इतमामात अंत्यसंस्कार करण्यात येणार आहेत. राज्याचे मंत्री धनंजय मुंडे आणि माजी मंत्री पंकजा मुंडे यांनी ट्विटरवरून शहीद महेश तिडके यांना श्रद्धांजली अर्पण करत आपले बलिदान सदैव स्मरणात राहिल, असे म्हटले आहे. पंजाबमधील भटिंडा येथे कर्तव्यावर असताना परळी तालुक्यातील लाडझरीचे जवान महेश यशवंत तिडके यांना वीरमरण आले. शहीद महेश तिडके यांना भावपूर्ण श्रद्धांजली! देशासाठीचे तुमचे बलिदान आम्ही नेहमी स्मरणात ठेवू. #अमर_जवान pic.twitter.com/ybqFyqPb10 — Dhananjay Munde (@dhananjay_munde) January 1, 2020 मातृभूमीचे रक्षण करताना पंजाबमध्ये आपल्या परळी तालुक्यातील लाडझरीचे भूमिपुत्र महेश तिडके यांना वीरमरण आले. देशाच्या संरक्षणासाठी सर्वोच्च बलिदान देणारे शहीद जवान महेश तिडके यांना माझी भावपूर्ण श्रद्धांजली !! जय हिंद !!! — Pankaja Gopinath Munde (@Pankajamunde) January 2, 2020 नौशेरा येथे नवर्षाच्या पहिल्याच दिवशी दहशतवाद्यांशी लढताना साताऱ्याचे जवन संदीप सावंत यांना वीरमरण आलं आहे. नौशेरा या ठिकाणी दहशतवाद्यांशी दोनहात करताना जवान संदीप सावंत शहीद झाले. ते सातारा जिल्ह्यातील मुंडे गावाचे रहिवासी होते. २५ वर्षीय संदीप सावंत यांच्यामागे त्यांची पत्नी सविता या आहेत. नववर्षाच्या पहाटे संदीप सावंत यांच्या गस्ती पथकाला नियंत्रण रेषेजवळ जंगलात हालचाली दिसल्या. सावंत यांच्यासह पथकातले सगळे सहकारी सज्ज झाले. दहशतवादी घुसखोरी करत असल्याचे त्यांना दिसले. दाट धुके व कडाक्याच्या थंडीमुळे नेमकी संख्या समजू शकली नाही. मात्र संदीप नाईक यांनी आणि त्यांच्या पथकाने दहशतवाद्यांशी दोन हात करण्यास सुरुवात केली. मात्र दहशतवाद्यांनी केलेल्या गोळीबारात संदीप यांना वीरमरण आलं.