भानापेठ वॉर्ड करोना प्रतिबंधक क्षेत्र म्हणून बंद केला म्हणून दुर्गा वैरागडे या महिलेने भाजपाच्या नगरसेविका शितल कुळमेथे यांना मारहाण केली. दरम्यान, शहर पोलीस ठाण्यात नगरसेविका कुळमेथे यांनी तक्रार दिली आहे. भानापेठ येथे एका वृद्ध महिलेला करोनाची लागण झाली. त्यामुळे प्रशासन व महापालिकेने हा भाग प्रतिबंधात्मक क्षेत्र म्हणून घोषित केला. या परिसरातील नागरिकांना फिरण्यास मनाई करण्यात आली होती. दरम्यान, या वॉर्डाच्या नगरसेविका शितल कुळमेथे या पाहणीसाठी गेल्या असता दुर्गा वैरागडे नामक महिलेने कोणत्या कारणावरून परिसर सील केला असा प्रश्न विचारत वाद घातला. दरम्यान, या वादाचे पर्यावसन मारहाणीत झाले. नगरसेविका शितल कुळमेथे यांनी शहर पोलीस ठाणे गाठून घटनेची तक्रार दिली आहे.
