News Flash

“तीन वेळा फोन…,” रावसाहेब दानवेंनी सांगितलं शरद पवारांच्या भेटीमागचं कारण

राजकीय वर्तुळात भेटीवरुन चर्चा

भाजपा नेते रावसाहेब दानवे गुरुवारी राष्ट्रवादी काँग्रेसचे अध्यक्ष शरद पवार यांच्या भेटीला पोहोचले होते. त्यानंतर शुक्रवारी सकाळी त्यांनी शिवसेना खासदार संजय राऊत यांची भेट घेतली. यामुळे राजकीय वर्तुळात चर्चा रंगली असून रावसाहेब दानवे यांनी मात्र यामागे कोणतंही राजकीय कारण नव्हतं असं सांगितलं आहे. साखर आणि कांदा मुद्द्यावर चर्चा करण्यासाठी आपण शरद पवारांची भेट घेतली असं त्यांनी सांगितलं असून संजय राऊत यांच्यासोबत करोनावर चर्चा झाल्याचा खुलासा केला.

एबीपी माझाशी बोलताना रावसाहेब दानवे यांनी सांगितलं की, “राज्यात साखर कारखान्यांचा प्रश्न निर्माण झाला आहे. अनेक कारखान्यांचे अकाऊंट एनपीएमध्ये गेले आहेत. अशा परिस्थितीत हे कारखाने सुरु करण्यासाठी बँका पैसे उपलब्ध करुन देण्यास तयार नाहीत. ऊसाचं पीक यावर्षी मोठ्या प्रमाणात आलं आहे. पुढच्या काळात शेतकरी अडचणीत येऊ नये. त्याचा संपूर्ण ऊस गाळला जावा यासाठी बँकांशी काय चर्चा करता येईल? राज्य सरकारने काय केलं पाहिजे? केंद्र सरकारच्या नेत्यांना भेटून काही करता येईल का? या विषयावर माझी आणि पवारांची चर्चा झाली”.

“याशिवाय कांदा प्रश्न ऐरणीवर आला आहे. कांदा उत्पादक शेतकऱ्यांचा असंतोष आम्ही पाहिला. त्यांना न्याय दिला पाहिजे. कांदा निर्यात बंद असल्याने भाव पडतील शेतकरी सांगत आहेत. त्यासाठी काय केलं पाहिजे यावर चर्चा झाली. पंतप्रधान नरेंद्र मोदींना भेटलं पाहिजे अशी चर्चा झाली,” असं रावसाहेब दानवेंनी सांगितलं. मोदींची वेळ मागितली असून त्यानंतर भेटीचं स्वरुप ठरवलं जाईल अशी माहिती यावेळी त्यांनी दिली.

“शरद पवार राज्यातील ज्येष्ठ आणि जाणकार नेते आहेत. मंत्री असलो तरी सभागृहात, राज्यात गेली २५ वर्ष आम्ही एकत्र काम करत आहोत. त्यामुळे विचारांची देवाण घेवणा होते. काही अडचण आल्यास चर्चा करतो. साखर कारखान्यांची समस्या आल्यानंतर शरद पवारांनी अनेकदा मला बोलावलं आहे. या महिन्यात मला तीन फोन आले. साखरेचे प्रश्न निर्माण झाले आहेत चर्चा करुयात असं त्यांनी सांगितलं. यासाठीच मी गेलो होतो,” असा खुलासा रावसाहेब दानवे यांनी केला आहे.

संजय राऊत यांच्यासोबतच्या भेटीवर बोलताना रावसाहेब दानवेंनी म्हटलं की, “दारात उभं राहिल्यावर दिसतो एवढी आमची घऱं जवळ आहेत. यावेळी आपण चहा घ्यायला या असं बोलत असतो. करोना सोडून कोणत्याही विषयावर आमच्यात चर्चा झाली नाही”.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on September 18, 2020 12:38 pm

Web Title: bjp raosaheb danve on meeting with ncp chief sharad pawar sgy 87
Next Stories
1 ऊर्जामंत्री नितीन राऊत यांना करोनाची लागण
2 आशिष शेलार गप्प का?; कंगनाच्या विधानावरून काँग्रेसचा सवाल
3 “उद्धव ठाकरेंनी योगी आदित्यनाथांचं अभिनंदनही केलं नाही,” आशिष शेलारांनी व्यक्त केली खंत
Just Now!
X