चंद्रपूर ब्रम्हपुरी तालुक्यातील चौगान येथील रहिवासी असलेल्या एका इसमाचा मृतदेह गावाजवळून वाहत असलेल्या गोसेखुर्दच्या कालव्यात वाहताना दिसल्याने एकच खळबळ उडाली. भीमक चौधरी असे त्या इसमाचे नाव असून ते ७५ वर्षांचे होते. बुधवारी सकाळी ११च्या सुमारास त्यांचा मृतदेह कालव्यातून वाहताना शेतकऱ्यांना दिसला. त्यानंतर हा प्रकार उघडकीस आला. भीमक हे मंगळवारी (२१ जुलै) सकाळी ९ वाजेपासून घरातून अचानक निघून गेले होते. त्यांच्या कुटुंबीयांनी मंगळवारपासूनच त्यांचा परिसरात सर्वत्र शोध घेतला, मात्र ते कुठेही सापडले नाहीत. आज दुपारी १ वाजता रानबोथली ते जवराबोळी मेंढा दरम्यान वाहत असलेल्या गोसेखुर्दच्या कालव्यात भीमक यांचा मृतदेह परिसरातील शेतकऱ्यांना दिसला. त्यांनी ही माहिती भीमक यांच्या कुटुंबीयांना दिली. कुटुंबीयांनी तत्काळ घटनास्थळी धाव घेत खात्री केली आणि याची माहिती ब्रम्हपुरी पोलीस स्टेशनला कळवली. पोलिसांनी घटनास्थळ गाठून पंचनामा केला व अकस्मिक मृत्यूची नोंद केली. सध्या मृतदेहाचे शवविच्छेदन करण्यासाठी ग्रामीण रुग्णालय ब्रम्हपुरी येथे शव नेले असून नक्की घटना कशी घडली असावी याचा तपास पोलीस करत आहेत.
