पतीचे टक्कल असल्याची माहिती लग्नाआधी लपवल्याने पत्नीने पोलीस ठाण्यात तक्रार दाखल केली आहे. मीरारोड येथील नया नगर पोलीस ठाण्यात ही तक्रार दाखल आहे. पोलिसांनी कौटुंबिक वादाचा गुन्हा दाखल केला असून तपास सुरू आहे. पोलिसांनी दिलेल्या माहितीनुसार, नया नगर येथील लक्ष्मी पार्क येथे राहणारे मोहम्मद मुर्तजा सय्यद (२९) यांचे एका महिन्यापूर्वी २४ वर्षीय महिलेशी लग्न झाले होते. लग्नानंतर त्या महिलेला सांगण्यात आले की, मुर्तजाच्या डोक्यावर केस नसून त्याला टक्कल आहे. त्यामुळे तो विगचा वापर करतो. हे जाणून महिलेला धक्का बसला. त्यामुळे सतत होणाऱ्या वादामुळे दोघांमधील संबंध ताणले जाऊ लागले होते. फसवणूक झाल्याचे लक्षात येताच महिलेने पतीच्या विरोधात पोलीस ठाण्यात तक्रार दाखल केली. अधिक तपास सुरू असल्याची माहिती वरिष्ठ पोलीस निरीक्षक कैलास बर्वे यांनी दिली.
