28 October 2020

News Flash

मी त्यांना अट घातली होती, त्यासाठीच भेटलो; राऊतांसोबतच्या भेटीवर फडणवीसांचा खुलासा

"ज्यावेळी हे सरकार पडेल, तेव्हा बघू"

संग्रहित छायाचित्र

शनिवारची संध्याकाळ महाराष्ट्रातील राजकीय वर्तुळासाठी खळबळ उडवून देणारी ठरली. राज्याचे मुख्यमंत्री देवेंद्र फडणवीस आणि शिवसेनेचे नेते व मुख्य प्रवक्ते खासदार संजय राऊत यांच्यात अचानक झालेल्या भेटीनं अनेकांच्या भुवया उंचावल्या. दोन्ही नेत्यांच्या भेटीनं वेगवेगळ्या चर्चांचे पेव फुटले आहेत. संजय राऊत यांच्यासोबत झालेल्या भेटीवर स्वतः देवेंद्र फडणवीस यांनी खुलासा केला आहे. या भेटीत त्यांनी संजय राऊत यांना घातलेल्या अटींचाही उल्लेख केला आहे.

राज्याचे माजी मुख्यमंत्री व सध्याचे विरोधी पक्षनेते देवेंद्र फडणवीस आणि शिवसेनेचे नेते खासदार संजय राऊत यांच्यात शनिवारी (२६ सप्टेंबर) मुंबईतील हयात हॉटेलमध्ये भेट झाली. या भेटीवरून वेगवेगळे तर्कविर्तक राज्यात लावले जात असून, खासदार संजय राऊत यांनी भेटीमागील कारणांचा उलगडा केला होता. त्यानंतर आता फडणवीस यांनीही भेटीचं कारण सांगितलं.

एएनआय वृत्तसंस्थेला बोलताना विरोधी पक्षनेते देवेंद्र फडणवीस म्हणाले, “शिवेसेनेच्या सामना दैनिकासाठी माझी मुलाखत घेण्याची संजय राऊत यांची इच्छा आहे. याच मुलाखतीसंदर्भात आमची बैठक झाली. या मुलाखतीसंदर्भात मी त्यांनी काही अटी घातल्या होत्या. त्यासाठीच भेट झाली. बैठकीत कोणतीही राजकीय चर्चा झाली नाही. कुठलाही भाग न वगळता मुलाखत प्रसिद्ध करण्यात यावी, अशी अट मी त्यांना घातली होती,” असं देवेंद्र फडणवीस म्हणाले.

“ज्यावेळी हे सरकार पडेल, तेव्हा बघू”

“शिवसेनेसोबत कोणतीही चर्चा सुरू नाही. त्यांच्यासोबत सरकार स्थापन करण्याची कोणतीही चर्चा बैठकीत केली नाही. त्यासाठी असं कोणतंही कारण नाही. जे सरकारचे काम सुरू आहे. त्यावर जनतेमध्ये प्रचंड आक्रोश आहे. त्यामुळे हे सरकार आपल्या कृतीमुळे कोसळेल. ज्यावेळी हे सरकार पडेल त्यावेळी आम्ही बघू, पण सरकार बनवण्याची कोणतीही घाई भाजपाला नाही,” असंही देवेंद्र फडणवीस म्हणाले.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on September 27, 2020 1:55 pm

Web Title: devendra fadnavis sanjay raut meeting mumbai shivsena bjp political alliance bmh 90
Next Stories
1 शिवसेनेच्या कंपाऊंडरला हेडलाइनमध्ये राहायची भूक लागली आहे, निरुपम यांचा राऊतांना टोला
2 फडणवीस आमचे शत्रू नाहीत, पण…, संजय राऊतांचा नवीन खुलासा
3 नांदेडमध्ये ८३ हजार हेक्टर क्षेत्रावरील पिकांचे नुकसान
Just Now!
X