अक्कलकोट तालुक्यातील बणजगोळ या गावात ग्रामपंचायत निवडणूक होत असून या निवडणूक काळामध्ये शांतता व सुव्यवस्था राखण्यासाठी या एकाच गावातील गुन्हेगारी पार्श्र्वभूमी असलेल्या दहा जणांवर एका महिन्यांसाठी हद्दपारीची कारवाई करण्यात आली. या कारवाईमध्ये उमेश पाटील, महेश पाटील, शरद पाटील, श्रीशैल पाटील ऊर्फ व्हसुरे, सिद्धाराम शरणप्पा पाटील ऊर्फ व्हसुरे, रेवप्पा व्हसुरे, गंगाधर पाटील, अशोक गडदे, मल्लिनाथ पाटील, गड्डेप्पा व्हसुरे अशा दहा जणांचा समावेश आहे. ग्रामपंचायत निवडणुकीत कायदा व सुव्यवस्था अबाधित राहावी म्हणून अक्कलकोट उत्तर पोलिसांनी तहसीलदारांकडे दहा समाजकंटकांविरुद्ध हद्दपारीच्या कारवाईचा प्रस्ताव पाठविला होता. तो त्यांनी मंजूर केल्याचे अक्कलकोट उत्तर पोलीस ठाण्याचे पोलीस निरीक्षक चंद्रकांत निरवाडे यांनी सांगितले. यापूर्वी अक्कलकोटच्या एका भाजप नगरसेवकाच्या गुन्हेगारी कारवाया पाहता त्याच्याविरुद्धही हद्दपारीची कारवाई करण्यात आली होती.
