ठेवीदारांची आर्थिक फसवणूक केल्याप्रकरणी तुरुंगात असलेले बांधकाम व्यावसायिक डी. एस. कुलकर्णी (डीएसके) यांचा मुलगा शिरीष कुलकर्णी अखेर पोलिसांसमोर हजर झाले आहेत. त्यांना न्यायालयात हजर करण्यात आलं असून २ जुलैपर्यंत पोलीस कोठडी सुनावण्यात आली आहे. गुंतवणूकदारांची कोट्यवधींची फसवणूक केल्याप्रकरणी पोलिसांनी डी. एस. कुलकर्णी आणि त्यांच्या कुटुंबीयांच्या विरोधात गुन्हे दाखल केले आहेत. या गुन्ह्यात शिरीष कुलकर्णी देखील आरोपी आहेत. सर्वोच्च न्यायालयाने शिरीष कुलकर्णी यांचा अटकपूर्व जामीन फेटाळला होता. तसंत त्यांना यांनी आठ दिवसात पोलिसांसमोर हजर व्हावे, असा आदेशही दिला होता. याआधी पुणे न्यायालय तसेच उच्च न्यायालयाने शिरीष कुलकर्णी यांचा जामीन अर्ज फेटाळला होता. मुंबई उच्च न्यायालयाने शिरीष कुलकर्णी यांना १८ जूनपर्यंत मुदत देत पोलिसांसमोर हजर राहण्याचा आदेश दिला होता. यानंतर शिरीष कुलकर्णी यांनी सर्वोच्च न्यायालयात धाव घेतली होती. मात्र सर्वोच्च न्यायालयातही त्यांना दिलासा मिळाला नाही. न्यायालयाने शिरीष कुलकर्णी यांना पोलिसांसमोर हजर होण्यासाठी दिलेली मुदत आज संपत होती. त्यामुळे आज ते पोलिसांसमोर हजर झाले. यानंतर पोलिसांनी त्यांना अटक केली.