कृष्णेत जलप्रदूषणाबरोबरच माशांच्या प्रजननावर गंभीर परिणाम मासेमारीसाठी डिटोनेटर्सचा वापर चोरटय़ा शिकारीकडून कृष्णाकाठावर केला जात असून यामुळे जलप्रदूषणाबरोबरच माशांच्या प्रजननावर गंभीर परिणाम होण्याचा धोका उत्पन्न झाला आहे. कृष्णा नदीकाठावर असलेल्या आमणापूर, राडेवाडी गावच्या पाणवठय़ावर डिटोनेटर्सचा स्फोट घडवून मासेमारी केली जात आहे. नदीच्या डोहात दुपारच्या वेळी डिटोनेटर्सचा स्फोट घडवून मेलेले मोठे मासे शिकारी नेत आहेत. मात्र या स्फोटात मेलेले लहान एक किलो वजनापर्यंतचे मासे तसेच पाण्यावर तरंगत आहेत. यामुळे कृष्णा नदीच्या पृष्ठभागावर मृत माशांचा खच पाहण्यास मिळत आहे. मृत माशामुळे दरुगधी पसरल्याने आणि पाणी प्रदूषित झाल्याने जनावरेही पिण्यासाठी या पाण्याचा वापर टाळत आहेत. याशिवाय डिटोनेटर्समधील अमोनियामुळे पाण्याशी रासायनिक प्रक्रिया होऊन याचा परिणाम माशांच्या प्रजननावर होण्याचा धोका निर्माण झाला आहे. स्थानिक पातळीवर विहीर खुदाईसाठी वापरण्यात येणाऱ्या काडतुसासाठी वापर करण्यात येणाऱ्या डिटोनेटर्सचा वापर मासेमारीसाठी होत असून या डिटोनेटर्सना स्थानिक पातळीवर केपा असे संबोधले जाते. याची विक्री ही ठरावीक ठिकाणीच परवानाधारक विक्रेत्यांकडूनच होत असल्याने प्रशासन अशा घातक वापरासाठी याचा विनियोग रोखू शकते. वन विभागानेही याकडे गांभीर्याने लक्ष देण्याची गरज व्यक्त केली जात आहे.
