अलिबाग शहरातील पीएनपीनगरमधील  संगीता शृंगार सेंटरला रविवारी पहाटे अचानक आग लागली. या आगीत दुकानातील सुमारे दहा लाख रुपयांचा माल जळून खाक झाला. सुदैवाने जीवितहानी टळली. आगीचे कारण समजले नसले तरी शॉर्ट सर्किटमुळे ही आग लागली असल्याचा अंदाज व्यक्त केला जात आहे.

अलिबाग तालुक्यातील सहाणगोठी येथील जयदीप शंकर तुणतुणे यांच्या मालकीचे पीएनपीनगर येथील एका इमारतीमध्ये तळमजल्यावरील गाळ्यामध्ये संगीता शृंगार सेंटर नावाचे दुकान आहे. ५ जून रोजी पहाटे ४ ते ४.३० वाजण्याच्या सुमारास अचानक दुकानाला आग लागली. हळूहळू आग वाढू लागली. ही बाब दुकानाच्या मालकांच्या लक्षात आल्यावर त्यांनी धाव घेतली. पोलिसांशी संपर्क साधून या घटनेची माहिती दिली. या घटनेची माहिती अलिबाग पोलिसांना मिळताच पोलीस घटनास्थळी पोहोचले. अलिबाग नगर परिषद  व आरसीएफ कंपनीच्या अग्निशमन दलाने तब्बल दोन तास प्रयत्न करून आग आटोक्यात आणली.  या आगीमध्ये कॉस्मेटिक व इतर जनरल साहित्य, तसेच टेलिरगचे मटेरियल्स, फॉल बिडिंगच्या साडय़ा व दुकानातील अन्य काही वस्तू जळून खाक झाल्या.