सांगली शहरातील मारुती रोडवर असलेल्या आनंद टॉकिजसमोर मध्यरात्री भीषण आग लागली. या आगीत एक बेकरी दोन दुकानं जळून खाक झाली. आजूबाजूची घरंही या आगीत भक्ष्यस्थानी पडली आहेत. अग्निशमन दलाला तातडीने पाचारण करण्यात आले. अथक प्रयत्नानंतर या आगीवर नियंत्रण मिळवण्यात अग्निशमन दलाला यश आलं आहे. या आगीत कोणतीही जिवीतहानी झालेली नाही. मात्र या आगीत लाखोंचं नुकसान झालं आहे. ही आग नेमकी का लागली ते स्पष्ट झालं नाही.

आनंद टॉकिजसमोर ही आग लागताच लोकांची एकच खळबळ उडाली. अनेकजण आग नियंत्रणात आणण्यासाठी प्रयत्न करत होते. अनेकजण सैरावैरा पळू लागले. आगीमुळे एकच हलकल्लोळ माजला होता. ही आग नेमकी का लागली ते अद्याप समजू शकलेले नाही. दरम्यान अग्निशमन दलाने माहिती मिळताच घटनास्थळी पोहचून अथक प्रयत्नांनी आग आटोक्यात आणली. मात्र बराच काळ या भागात आगीचे लोळ आणि धुराचे लोट पाहण्यास मिळाले.