शहरातील देगलूरनाका परिसरातील रहेमतनगर येथे एका घराला लागलेल्या आगीत रंगकाम करणाऱ्या कुटुंबातील चौघांचा होरपळून मृत्यू झाला. ही दुर्घटना रविवारी पहाटे घडली. अब्दुल समद शेख हुसेन (वय २६) त्याची पत्नी असमाबेगम अब्दुल समद (वय २३), मुलगा शेख बिलाल (२) अब्दुल समद, मुलगी जोहा (३) अशी मृतांची नावे आहेत. शनिवारी रात्री अब्दुल समद हा आपल्या कुटुंबीयांसह जेवण करून रात्री झोपला होता. कुटुंबीय झोपेत असतानाच त्यांच्या घराला आग लागली. या आगीने घरातील टीव्ही, कुलर व इतर संसारोपयोगी साहित्याने पेट घेतला. याप्रकरणी सिडको ग्रामीण पोलीस ठाण्यात गुन्हा दाखल करण्यात आला असला तरी नेमकी आग कशामुळे लागली हे अजून स्पष्ट झाले नाही.
