नाईकबाच्या नावानं चांगभलं असा जयघोष अन् गुलाल खोब-याची एकच उधळण करीत भाविकांच्या बाहूगर्दीत श्रीक्षेत्र बनपूरी (ता. पाटण) येथील नाईकबा देवाची यात्रा उत्साहात पार पडली. ३ लाखांवर भाविकांनी यात्रेस हजेरी लावल्याचा दावा यात्रा समितीने केला आहे. पाटणचे तहसीलदार रवींद्र सबनीस, प्रांताधिकारी किशोर पवार, महसूल व विविध विभागाचे कर्मचारी नाईकबा मंदिर परिसरात यात्रेच्या नियोजनावर लक्ष ठेवून होते. महाराष्ट्र व कर्नाटकातील अगणित भाविकांचे अढळ श्रध्दास्थान असणा-या, तसेच बनपुरी व जानुगडेवाडी, (ता. पाटण) या गावांचे ग्रामदैवत असणा-या नाईकबा देवाच्या यात्रेनिमित्त नाईकबाचा डोंगरमाथा व परिसर भाविकांनी फुलून गेला होता. असंख्य भाविक मुक्कामाच्या तयारीने यात्रा स्थळावर दाखल होते. पहाटे ५ वाजता नाईकबाची आरती व पूजा करण्यात आली. त्यानंतर पहाटे ६ वाजता नाईकबाच्या छबिन्याला सुरूवात झाली. छबिन्यात नाईकबाच्या पालखीसह विविध देवांच्या सासनकाठय़ा ढोल-ताशांच्या तालात नाचत होत्या. सासनकाठय़ांचे नयनरम्य दृश्य डोळय़ांचे पारणे फेडणारे होते. भाविकही मोठय़ा संख्येने छबिन्यात सहभागी झाले होते. यात्रा परिसरात शांतता व सुव्यवस्था राखण्यासाठी पोलीस पथके तैनात करण्यात आली होती.
