28 September 2020

News Flash

करोनाच्या टाळेबंदीत ताडोबा व्याघ्र प्रकल्पातून ‘गुड न्यूज’

प्रसिध्द माया वाघिणीने दिला पाच पिल्लांना जन्म

संग्रहीत छायाचित्र

ताडोबा-अंधारी व्याघ्र प्रकल्पात करोनाच्या टाळेबंदीत‘ गुड न्यूज’ अर्थात आनंदाची बातमी आली असून माया(टी-१२) नावाच्या प्रसिध्द वाघिणीने पाच पिल्लांना जन्म दिला आहे. आता ही पिल्लं तीन महिन्यांची झाली असून सुखरूप असल्याचे ताडोबा व्यवस्थापनाने कळविले आहे.

करोनाच्या टाळेबंदीचा फटका सर्वांसोबत ताडोबा-अंधारी व्याघ्र प्रकल्पालाही बसला आहे. मागील तीन महिन्यांपासून हा प्रकल्प बंद असल्याने व्याघ्र पर्यटन पूर्णत: बंद आहे. ताडोबाची ऑनलाईन व्याघ्र सफारी आणि ताडोबाचे संरक्षण सुरू आहे. वाघिणीचा मृत्यू आणि मानव-वन्यजीव संघर्ष निर्माण करणारा वाघ जेरबंद या दोन घटनांमुळे ताडोबा चर्चेत आला असतांनाच आता करोनाच्या टाळेबंदीत ताडोबातील प्रसिध्द वाघीण माया हिने पाच पिल्लांना जन्म दिला असल्याची गुड न्यूज समोर आली आहे.

ताडोबा-अंधारी व्याघ्र प्रकल्पाचे संचालक एन.आर.प्रवीण यांनी दिलेल्या माहितीनुसार, ताडोबातील एका कर्मचाऱ्याला माया ही वाघीण तिच्या पाच पिल्लांसोबत आनंदाने खेळत असल्याचे चित्र जंगलात दिसले. त्याने ही माहिती ताडोबा व्यवस्थापनाला दिली. तेव्हापासून माया या वाघिणीवर विशेष लक्ष ठेवले जात आहे. क्षेत्र संचालक प्रवीण यांनी दिलेल्या माहितीनुसार माया वाघीण व तिचे पाचही पिल्ल अतिशय सुरक्षित आहेत. भारतात करोनाची टाळेबंदी २४ मार्च रोजी जाहीर झाली. त्यापूर्वी एक दिवसाचा बंद पाळण्यात आला होता. त्याच दरम्यान माया वाघिणीने या पिल्लांना जन्म दिला असावा असा अंदाज व्यक्त केला जात आहे. विशेष म्हणजे एप्रिल महिन्यातही ताडोबातील एका पानवठ्याजवळ माया व तिच्या पिल्लांना बघितल्या गेले आहे. टाळेबंदीत माया वाघिणीने पाच पिल्लांना जन्म दिल्याने ताडोबा व्यवस्थापनात आनंदाचे वातावरण आहे.

ताडोबा-अंधारी व्याघ्र प्रकल्प करोनाच्या टाळेबंदीने मागील तीन महिन्यांपासून बंद आहे. मात्र ताडोबा बफर १ जुलै पासून पर्यटकांसाठी खुला करावा अशी चर्चा सुरू झाली आहे. यावर वन्यजीव विभाग गांभिर्याने विचार करित आहे. वरिष्ठ पातळीवर चर्चा सुरू असली तरी सध्यातरी असा कुठलाही निर्णय घेण्यात आलेला नाही अशी माहिती ताडोबाचे क्षेत्र संचालक एन.आर.प्रवीण यांनी लोकसत्ताशी बोलतांना दिली.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on June 12, 2020 10:16 pm

Web Title: good news from tadoba tiger project in coronas lockdown msr 87
Next Stories
1 सांगली, कोल्हापूरच्या पूरस्थिती उपाययोजनांचा उपमुख्यमंत्री अजित पवार यांच्याकडून आढावा
2 सरसेनापती घोरपडे साखर कारखान्याचे ३०० कोटींचे विस्तारीकरण
3 वर्धा : कंत्राटी आरोग्य कर्मचाऱ्यांच्या कामबंद आंदोलनाचा प्रशासनास फटका!
Just Now!
X