वसमत तालुक्यातील कुरुंदा येथे गॅस सिलिंडरच्या स्फोटामध्ये एकाच कुटूंबातील तीन जणांचा भाजून मृत्यू झाल्याची घटना शुक्रवारी पहाटे घडली. या घटनेमुळे कुरुंदा परिसरावर शोककळा पसरली आहे. वसमत तालुक्यातील कुरुंदा येथे सोनाजी दळवी यांचे घर आहे. गुरुवारी रात्री सोनाजी आनंदराव दळवी (वय ५५), त्यांची पत्नी सुरेखा सोनाजी दळवी (वय ४५) व त्यांची मुलगी पूजा सोनाजी दळवी ( वय २५ ) हे घरात झोपले होते. शुक्रवारी पहाटे दोन वाजण्याच्या सुमारास घरात अचानक गॅस सिलिंडरचा स्फोट झाला. या स्फोटांमध्ये घरातून आगीचा मोठा भडका उडाला. झोपेत असलेल्या दळवी कुटुंबाचा आगीत होरपळून मृत्यू झाला. घराला आग लागल्याचे लक्षात येताच परिसरातील नागरिक व पोलिसांनी घटनास्थळी धाव घेऊन आग विझवण्याचा प्रयत्न केला. मात्र आगीचा भडका खूप मोठा असल्यामुळे आग नियंत्रणात आणणे कठीण झाले होते. तोवर वसमत येथील अग्निशामक दलाला पाचारण करण्यात आले. अग्निशमन दल आणि ग्रामस्थांनी अथक प्रयत्नानंतर आगीवर नियंत्रण मिळवले. मात्र, तोवर दळवी कुटुंबातील तिघांचाही होरपळून मृत्यू झाला. पूजा दळवी ही पुणे येथील होमिओपॅथी अभ्यासक्रमाचे शिक्षण घेत होती. नातेवाईकाचे लग्न असल्यामुळे पूजा काही दिवसापूर्वी कुरुंदा येथे आली होती असे पोलिसांनी सांगितले.
