जालना येथील शासकीय कोविड हॉस्पिटलमध्ये उपचारादरम्यान रुग्णाच्या फोन पे वरून रक्कम काढली, त्यानंतर रूग्णांचा मृत्यू झाल्यावर त्याच्या खिशातील ४५ हजार रूपये देखील चोरल्याचा आरोप, मृत्यू झालेल्या रूग्णाच्या नातेवाईकांनी रूग्णालयाच्या वॉर्ड बॉयवर केला आहे. तसेच, या संदर्भात पोलीस तक्रार दाखल करून घेत नसल्याची जिल्हाधिकाऱ्यांकडे देखील तक्रार केली आहे. जालन्यातील शासकीय कोविड हॉस्पिटलमध्ये उपचारा दरम्यान मृत्युमुखी पडलेल्या रुग्णाच्या नातवाईकांनी कोविड रुग्णालयातील वॉर्ड बॉयवर पैसे चोरीचा आरोप केला आहे. रुग्णाच्या अंगठ्याचा वापर करून त्यांच्याच फोन पे वरून वॉर्ड बॉयने ६ हजार ८०० रुपयांची रक्कम परस्पर काढून घेतल्याचा नातेवाईकांचा आरोप आहे. तर, रुग्णाच्या खिशात असलेले ४५ हजार रूपये देखील वॉर्ड बॉयनेच काढून घेतल्याचा आरोप देखील मृत्युमुखी पडलेल्या रुग्णाच्या नातेवाईकांनी केला आहे. तसेच, या संदर्भात पोलीस तक्रार घेत नसून या प्रकरणाची सखोल चौकशी करुन कारवाई करावी अशी मागणी रुग्णाच्या नातवाईकांनी जिल्हाधिकाऱ्यांकडे केली आहे.
