अधिक महिन्याच्या एकादशीमुळे पंढरीत भाविकांची गर्दी पंढरपूर : अधिक महिन्याच्या एकादशी निमित्त लाखो भाविक पंढरपुरात दाखल झाले आहेत. राज्यासह कर्नाटक,आंध्र प्रदेशातून भाविक मोठय़ा श्रध्येने श्री विठ्ठलाच्या दर्शनाला आले आहेत. मंदिर समितीने भाविकांना सुलभ आणि जलद दर्शन व्हावे म्हणून उपाययोजना केल्या आहेत. एकादशीनिमित्त पुण्यातील भाविकाने श्री विठ्ठल आणि रुक्मिणी मातेच्या गाभाऱ्यास फुलांनी आरास केल्याची माहिती मंदिर समितीचे कार्यकारी अधिकारी तथा प्रांताधिकारी सचिन ढोले यांनी दिली आहे. यंदाच्या वर्षी अधिक अर्थात पुरषोत्तम मास आला आहे. या महिन्यात जावयाला वाण देण्याची प्रथा आहे. तर वारकरी सांप्रदायात अधिक मासात श्री विठ्ठल आणि रुक्मिणी मातेचे दर्शन घेणे याला महत्त्व आहे. या महिन्याच्या एकादशी निमित्त राज्यासह परराज्यातून भाविक येथे दाखल झाले आहेत. एकादशीला चंद्रभागा नदीत स्नान, नगरप्रदक्षिणा आणि सावळ्या विठुरायाचे दर्शन घेण्यास भाविक दर्शन रांगेत उभा होता. श्री विठ्ठलाचे पदस्पर्श दर्शनासाठी साधारणत: ६ ते ७ तास लागत आहेत. या दर्शन रांगेत ऊन, वारा, पाऊ स याचा त्रास होऊ नये म्हणून समितीने विशेष दक्षता घेतली असल्याची माहिती समितीचे कार्यकारी अधिकारी सचिन ढोले यांनी दिली आहे. तसेच, दर्शन रांगेत पिण्याच्या पाण्याची सोय समितीने उपलब्ध केल्याने भाविकांनी समाधान व्यक्त केले आहे. मंदिर समिती, पालिका प्रशासनाने भाविकांसाठी सोयी सुविधा देण्यास विशेष प्रयत्न केलेले दिसून आले आहे. तसेच शहरात वाहतूक व्यवस्था तसेच कोणताही अनुचित प्रकार होऊ नये म्हणून पोलीस बंदोबस्त वाढविण्यात आला आहे. एकादशी निमित्त पुण्यातील भाविक राम जांभुळकर यांनी श्री विठ्ठल आणि रुक्मिणी मातेच्या गाभाऱ्यास आकर्षक फु लांनी सजविलेआहे. पंढरी नगरी टाळ,मृदंगाच्या जयघोषाने दुमदुमून निघाली आहे.