पुण्यातील सीरम इन्स्टिट्यूटमध्ये लागलेली आग नियंत्रणात आल्याची माहिती मुख्यमंत्री उद्धव ठाकरे यांनी दिली आहे. मुंबईत आयोजित पत्रकार परिषदेत बोलताना उद्धव ठाकरेंनी सांगितलं की, “देशातील लसीकरण मोहिमेत सीरमचा सिंहाचा वाटा असून त्याच संस्थेत आग लागली आहे. प्राथमिक माहितीनुसार कोव्हिडची लस तयार करणाऱ्या विभागाला आग लागलेली नाही. बीसीजी लस तयार केली जाते तिथे आग लागली होती. ही आग नियंत्रणात आली असून एकूण सहा जणांना बाहेर काढण्यात यश आलं”.
पुण्याची सीरम इन्स्टिट्यूट आगीच्या तडाख्यात
बांधकाम सुरु असून विद्युत बिघाडामुळं आग लागल्याची प्राथमिक माहिती असल्याचं उद्धव ठाकरेंनी यावेळी सांगितलं. काम नेमकं काय सुरु होतं याची माहिती संपूर्ण आग विझल्यानंतर येईल असंही ते म्हणाले. जीवीतहानी झाल्याची अद्याप कोणतीही माहिती नसल्याचंही ते म्हणाले.
पुण्याच्या सीरम इन्स्टिट्यूटमध्ये भीषण आग
“अदर पूनावाला यांच्यासोबत माझं काही बोलणं झालेलं नाही. मी प्रशासकीय यंत्रणेकडून माहिती घेतली. सर्व शांत झाल्यावर मी सगळ्यांशी संवाद साधणार आहे. कोणाला फोन करुन त्रास दिलेला नाही. आग विझवण्याचं काम पूर्ण झालं की आपल्याला माहिती मिळेल. नुसतं मी फोन करुन काहीच होणार नाही,” असं उद्धव ठाकरेंनी यावेळी सांगितलं. अग्निशन दलाच्या जवानांनी जीव धोक्यात घालून केलेल्या कामगिरीबद्दल उद्धव ठाकरेंनी त्यांचं कौतुक केलं. सध्या आहे ते सुरक्षित ठेवणं याला प्राधान्य असल्याचं उद्धव ठाकरेंनी सांगितलं.
Six people have been rescued (from fire). Prima facie it seems that the fire was caused by an electric fault. The COVID vaccine is safe. I have not spoken to Adar Poonawalla till now: Maharashtra CM Uddhav Thackeray https://t.co/UcoW67qqsU
— ANI (@ANI) January 21, 2021
उद्धव ठाकरेंना यावेळी विरोधक यामागे घातपात असल्याचा संशय व्यक्त करत आहेत याबद्दल विचारण्यात आलं असता ते म्हणाले की, “त्यांच्याकडे ही माहिती कशी येते? सर्जिकल स्ट्राइक वैगेरे इतर गोष्टी कशा कळतात हे गुपित आहे. त्यांचं ज्ञान अगाध आहे. काही विद्या वैगेरे प्राप्त असेल, माहिती असेल तर जरुर द्यावी. त्यांना जरा संयमाची लस टोचण्याची गरज आहे”.
लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.
First Published on January 21, 2021 5:25 pm
