मोबाइल फोनच्या बॅटरीसोबत खेळत असताना अचानक बॅटरीचा स्फोट होवून दोघं भावंडं गंभीर जखमी झाली आहेत. औरंगाबादच्या वैजापूर तालुक्यातील शिवूर येथील घोडके वस्तीवर सोमवारी सकाळी नऊ वाजता ही घटना घडली. कृष्णा (वय ८)आणि कार्तिक (वय ५) हे दोघे भाऊ मोबाइल फोनची बॅटरी बाहेर काढून तिच्यासोबत खेळत होते. मात्र त्याच वेळी अचानक बॅटरीचा स्फोट झाला. या स्फोटात दोन्ही भावंडांच्या हाताला गंभीर इजा झाली असून त्यांना उपचारासाठी घाटी रुग्णालयात दाखल करण्यात आलं आहे. कृष्णा रामेश्वर जाधव आणि कार्तिक रामेश्वर जाधव अशी जखमी भावंडांची नावे आहेत. सकाळी नऊच्या सुमारास घडलेल्या या घटनेनंतर सर्वप्रथम या दोघा भावंडांना शिवूर येथील दवाखान्यात दाखल करण्यात आलं होतं. मात्र, नंतर अधिक उपचारासाठी औरंगाबाद येथील घाटी रुग्णालयात हलवण्यात आलं आहे.
