15 July 2020

News Flash

‘निसर्ग’ चक्रीवादळ आज अलिबागमध्ये धडकणार

दुर्घटना टाळण्यासाठी किनारपट्टीवरील भागात  वीज पुरवठाही खंडीत केला जाणार आहे. 

संग्रहित छायाचित्र

पाच हजार लोकांना सुरक्षित स्थळी हलविले; जिल्ह्य़ात २४ तासांसाठी संचार बंदी लागू

अरबी समुद्रात तयार झालेल्या कमी दाबाच्या क्षेत्रामुळे तयार झालेले निसर्ग चक्रीवादळ बुधवारी (दि.३ जून) अलिबाग जवळच्या किनाऱ्यावर धडकणार आहे.  त्यामुळे  जिल्ह्यात  सतर्कतेचा इशारा देण्यात आला आहे. चक्रीवादळाच्या पार्श्वभुमीवर पाच हजार नागरिकांना सुरक्षितस्थळी स्थलांतरीत करण्यात आले आहे. तर खबरदारीचा उपाय म्हणून जिल्हात संचारबंदी लागू करण्यात आली आहे. जिल्हात राष्ट्रीय आपत्ती दलाच्या पाच तुकडय़ा तर तटरक्षक दल आणि नागरी सुरक्षा दलाच्या तुकडय़ा तैनात करण्यात आल्या आहेत. दुर्घटना टाळण्यासाठी किनारपट्टीवरील भागात  वीज पुरवठाही खंडीत केला जाणार आहे.

निसर्ग चक्रीवादळ ३ जून रोजी हरिहरेश्वर येथे धडकण्याची शक्यता वर्तवण्यात आली होती. परंतु हे वादळ आता अलिबागच्या दिशेने सरकले आहे. बुधवारी दुपारी १२ ते १च्या दरम्यान हे चक्रीवादळ अलिबागच्या किनाऱ्यावर धडकण्याची शक्यता आहे. वादळाचा वेग ताशी ९० ते १२५ किमी असेल.  यावेळी किनारपट्टीवरील भागात मुसळधार पावसाचीही शक्यता आहे. ही बाब लक्षात घेऊन जिल्’ात संचारबंदी लागू करण्यात आली आहे.  स्थानिकांना समुद्र किनाऱ्यांवर जाण्यासही निर्बंध घालण्यात आले आहेत. मच्छीमारांना मासेमारीला जाण्यास बंदी करण्यात आली आहे.

राष्ट्रीय आपत्ती निवारण दलाची (एनडीआरएफ) तीन पथके अलिबागमध्ये तैनात करण्यात आली आहेत. श्रीवर्धल येथे एनडीआरएफचे २ पथक. मुरूड येथे  तटरक्षक दलाचे १ पथक, उरण सेथे नागरी सुरक्षा दलाचे एक पथक तैनात करण्यात आले आहे.

किनारपट्टीवर चार नगरपालिका आणि ६२ गावांना या वादळाचा तडाखा बसण्याची शक्यता आहे. सुमारे १ लाख ७३ हजार लोक राहतात. त्या सर्वाना सतर्क राहण्याच्या सुचना देण्यात आल्या आहेत.  खबरदारीची उपाय योजना म्हणून  रायगड जिल्’ातील अलिबाग, उरण, श्रीवर्धन, मुरूड या तालुक्यांमधील कोळी वाडय़ांमधील कच्च्या घरांमध्ये राहणाऱ्या पाच हजार लोकांना सुरक्षित स्थळी हलविण्यात येत आहे. धोकादायक इमारतींमध्ये राहत असलेल्या लोकांना सुरक्षित ठिकाणी जाण्याच्या सुचना देण्यात आल्या आहेत. ५ हजार ६६८ मच्छीमार बोटी किनाऱ्यावर आल्या आहेत.

वादळानंतर ताशी ८० ते ९० किमी वेगाने वारे वाहणार आहेत. तसेच पाऊस देखील पडणार आहे. त्यामुळे खबरदारीची उपाय योजना म्हणून किनारपट्टीच्या गावांमधील वीजपरवठा खंडित करण्यात येणार आहे.

या काळात मुसळधार ते अतिमुसळधार पावसाची शक्यता आहे. त्यामुळे बुधवारी रायगड जिल्हातील लोकांनी घरातून बाहेर पडू नये. जनता कर्फ्यु पाळावा, असे आवाहन रायगडच्या जिल्हाधिकारी निधी चौधरी यांनी केले आहे. सकाळी जिल्हाधिकारी निधी चौधरी यांनी अलिबाग कोळीवाड येथे भेट दिली. तेथील लोकांशी चर्चा केली व कोळी बांधवांना सूचना दिल्या.

‘धोकादायक इमारतींमध्ये राहत असलेल्या लोकांनी सुरक्षित ठिकाणी जावे. वादळाच्या काळात लोकांनी घराच्या बाहेर पडण्याचे टाळावे. एक दिवस काळजी घ्या. ३ जून रोजी वादळ कर्फ्यु पाळा. ’

–   निधी चौधरी, जिल्हाधिकारी रायगड

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on June 3, 2020 12:10 am

Web Title: nisarga cyclone will hit alibag today abn 97
Next Stories
1 रत्नागिरी जिल्ह्याच्या उत्तर भागाला चक्रीवादळाचा जास्त धोका
2 जळगावात २५ पोलीस करोनाबाधित
3 करोनाबाधित रुग्णांसाठी रत्नागिरीत नवीन सुविधा
Just Now!
X