धुळ्यात भरधाव वेगाने जाणाऱ्या ट्रॅक्टरने दुचाकीला धडक दिल्याने झालेल्या अपघातात एक जण ठार तर एक जण गंभीर जखमी झाला आहे. चाळीसगाव रोडवरील जुनवणे गावाजवळ ही घटना घडली. धुळ्यातील बोरविहिर येथे राहणारे राहुल बंडू गायकवाड (वय १४ वर्षे) आणि बाबू किशोर गायकवाड (वय १८ वर्षे) हे दोघे दुचाकीवरुन चाळीसगाव रोडमार्गे येत होते. जुनवणे गावाजवळील हॉटेल कन्हैय्या समोर त्यांच्या मोटरसायकलला समोरुन येणार्‍या ट्रॅक्टरने धडक दिली. ट्रॅक्टरच्या जोरदार धडकेमुळे बाबू आणि राहुल गंभीर जखमी झाले. घटनास्थळी जमलेल्या लोकांनी दोघांनाही हिरे मेडिकल कॉलेजच्या रुग्णालयात दाखल केले. यानंतर बाबू गायकवाडला डॉक्टरांनी तपासून मृत घोषित केले. तर राहुल गायकवाड याची प्रकृती चिंताजनक असून त्याच्यावर उपचार सुरु आहेत.
