परळी शहरातील वैद्यनाथ मंदिर परिसरात भीक मागणाऱ्या एका भिकाऱ्याची १ लाख ७२हजारांची चोरी गेलेली रक्कम परळी पोलिसांनी अवघ्या काही तासात मिळवून दिली. बाबुराव नाईकवाडे हे मागील अनेक वर्षांपासून वैद्यनाथ मंदिर परिसरात भीक मागून आपला उदरनिर्वाह करत आहेत. मात्र करोनामुळे मंदिर बंद असल्याने अनेक भिकाऱ्यांवर उपासमारीची वेळ आली आहे. यात आयुष्यभर जमा केलेली रक्कम चोरट्याने लंपास केल्याने नाईकवाडे चिंताग्रस्त झाले होते. अशातच परळी पोलीस नाईकवाडेंच्या मदतीला धावून आले आणि त्यांनी अवघ्या काही तासातच त्यांना चोरीला गेलेली रक्कम मिळवून दिली. एकीकडे कोरोनाचं संकट असल्यानं अनेकांच्या नोकऱ्या गेल्यात या परिस्थितीत एका भिकाऱ्याकडे मात्र मोठी रक्कम मिळून आल्यानं आश्चर्य व्यक्त केलं जातं आहे.
