News Flash

खडसे-भाजप यांच्यामध्ये तडजोड

महसूलमंत्री एकनाथ खडसे यांना बडतर्फ करण्याऐवजी त्यांचा राजीनामा घेणे

राधाकृष्ण विखे पाटील

विरोधी पक्षनेते राधाकृष्ण विखे यांचा आरोप
महसूलमंत्री एकनाथ खडसे यांना बडतर्फ करण्याऐवजी त्यांचा राजीनामा घेणे ही भारतीय जनता पक्ष आणि एकनाथ खडसे यांच्यातील तडजोड (डील) आहे, असा आरोप विधानसभेतील विरोधी पक्षनेते राधाकृष्ण विखे यांनी शुक्रवारी केला. भ्रष्टाचाराच्या विरोधात कारवाई करण्याची धमक भाजपमध्ये नाही, असे ते म्हणाले.
विखे म्हणाले, भाजप आणि खडसे यांच्यातील तडजोडीनुसार खडसेंनी पक्ष फोडू नये,तूर्तास राजीनामा द्यावा, पक्षाची अब्रू जाऊ देऊ नये. या मोबदल्यात हे वर्ष संपण्यापूर्वीच सर्व आरोपातून ‘क्लीन चीट; देऊन खडसे यांना पुन्हा मंत्रिमंडळात सामावून घेतले जाणार आहे. खडसेंवर कारवाई केली तर, पक्षात फूट पडेल, अशी भीती भाजपला आहे. त्यामुळेच खडसेंचा राजीनामा घेण्यापूर्वी भाजपने विधानपरिषद निवडणुकीतील दोन उमेदवारांचे अर्ज घेतले. खडसेंची भीती नसती तर कदाचित भाजपने ही निवडणूक बिनविरोध होवू दिली नसती, असे विखे म्हणाले. काँग्रेसने फक्त आरोप केले, पुरावे दिले नाहीत या खडसेंच्या विधानाचा विखे यांनी चांगलाच समाचार घेतला. ते म्हणाले,ह्वदाऊदशी संभाषण झाले की, नाही याचा पुरावा दाऊदकडून आणायला आमच्याकडे दाऊदचा नंबर नाही. खडसे यांच्याकडे तो आहे. त्यांनी दाऊदला फोन करुन त्यांचे बोलणे झाले की, नाही हे जाहीर करायला सांगावे.ह्व भोसरी एमआयडीसी जमीन खरेदी प्रकरणात उद्योगमंत्र्यांनी सांगितले की, ही जमीन एमआयडीसीची आहे. यापेक्षा आणखी मोठा काय पुरावा असू शकतो, असा सवाल विखे यांनी केला. अंबरनाथ येथील जमिनीची किंमत ५ कोटी असताना त्यासाठी ३० कोटींची लाच कशी मागितली जाऊ शकते, असा खडसे यांचा दावा आहे. परंतु काँग्रेसच्याच प्रवक्यांनी महसूल विभागाची कागदपत्रे सादर करुन या जमिनीची किंमत तब्बल २२६ कोटी असल्याचे स्पष्ट केले. खडसेंना त्यांच्या अखत्यारीतील विभागाच्या कागदपत्रांवर विश्वास नाही, असाच याचा अर्थ होतो.

‘भाजपमध्ये धमक नाही’
भाजपचे प्रदेशाध्यक्ष रावसाहेब दानवे यांनी पक्ष खडसेंच्या पाठीशी असल्याचे सांगितले, पण काल-परवापर्यंत खडसे यांची बाजू मांडायला त्यांचे पक्ष प्रवक्ते तयार नव्हते. आता तडजोड झाल्यानंतर भाजप अचानक खडसे यांच्या पाठिशी राहिला आहे. त्यामुळे भाजपची भ्रष्टाचाराबाबत अनास्था उघड झाली आहे. भ्रष्टाचाराविरुध्द कारावाई करण्याची भाजपची धमक नाही, असे विखे म्हणाले.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on June 5, 2016 1:41 am

Web Title: radhakrishna vikhe patil comment on eknath khadse
Next Stories
1 सोलापूर राष्ट्रवादीची घडी अजितदादा कशी बसवणार?
2 इगतपुरीमध्ये आज काँग्रेस कार्यकर्त्यांचा मेळावा
3 शेतकऱ्यास आत्महत्येस प्रवृत्त केल्याप्रकरणी गुन्हा
Just Now!
X