भीमा कोरेगाव हिंसाचाराप्रकरणी संभाजी भिडे यांच्या अटकेसाठी मुंबईत एल्गार मोर्चाशहरातील निघाला असतानाच दुसरीकडे सांगलीत २८ मार्च रोजी (बुधवारी) भिडेंच्या समर्थनार्थ मोर्चा काढण्यात येणार आहे. पुष्पराज चौक येथे भिडे गुरुजींचे ३० फूट उंचीचे भव्य पोस्टर उभारण्यात आले असून या प्रकरणी आंबेडकरवादी संघटनांच्या पदाधिकाऱ्यांनी सांगली पोलिसांकडे धाव घेतली आहे. संभाजी भिडे यांच्या अटकेसाठी मुंबईत सोमवारी प्रकाश आंबेडकर यांच्या नेतृत्वाखाली एल्गार मोर्चा काढण्यात आला. मुंबईत संभाजी भिडेंविरोधात कारवाईची मागणी केली जात असतानाच दुसरीकडे सांगलीत संभाजी भिडेंच्या समर्थनार्थ पोस्टर उभारण्यात आले आहे. ३० फूट उंचीचे हे पोस्टर असून शहरातील अन्य ठिकाणीही पोस्टर लावले जात आहे. बुधवारी सांगलीत संभाजी भिडे यांच्या समर्थनार्थ मोर्चा देखील काढण्यात येणार आहे. संभाजी भिडेंच्या समर्थनार्थ निघणाऱ्या मोर्चाला परवानगी देऊ नये आणि मोर्चात सहभागी होणाऱ्या लोकांवर गुन्हे दाखल करावे, अशी मागणी आंबेडकरवादी संघटनांच्या कार्यकर्त्यांनी केली आहे. आता २८ मार्च रोजी निघणाऱ्या शिवप्रतिष्ठानच्या मोर्चाला पोलीस परवानगी मिळेल का, याकडे सर्वांचे लक्ष लागले आहे. मात्र, या पोस्टरबाजीमुळे शहरातील वातावरण चांगलेच तापले आहे.
