शिवजयंती निमित्त लातूरमध्ये अडीच एकर जागेवर रांगोळीच्या माध्यमातून छत्रपती शिवाजी महाराज यांचे रेखाचित्र साकारण्यात आले आहे. या चित्रासाठी ५० हजार किलो रांगोळीचा उपयोग करण्यात आला आहे. १७ ते १९ फेब्रुवारी दरम्यान सर्वांना पाहण्यासाठी रांगोळी खुली ठेवण्यात आली आहे. लातूर येथील मंगेश निपाणीकर, दिनेश लोखंडे आणि तेजेश शेरखाने यांच्यासह ५० जणांनी ही रांगोळी साकारली आहे. यासाठी सुमारे ६ दिवस लागले असल्याचीही माहिती समोर आली आहे. रांगोळी बाबत माहिती देताना, अतिशय दुर्मिळ असे रंग वापरून रांगोळी काढण्यात आल्याचे निपाणीकर यांनी सांगितले. थ्री डी स्वरूपातील ही रांगोळी असून रंगाच्या अनेक छटा त्यात साकारल्या आहेत. जगातील सर्वात मोठी रांगोळी असुन त्याची गिनीज बुक मध्ये नोंद करण्यात आली आहे. शिवाजी महाराज यांचे सिंहासनावर विराजमान झालेले हे छायाचित्र काढण्यात आले आहे. शिवप्रेमीमधून रांगोळीचा खर्च जमा करण्यात आला. लातूरमधील कला शिक्षकांनी देखील रांगोळीच्या रेखाटनात सहभाग घेतला. लातूरचे पालकमंत्री संभाजी पाटील निलंगेकर यांच्या हस्ते उदघाटन करण्यात आलं असून ही रांगोळी लातूरची अस्मिता ठरेल असे मत त्यांनी व्यक्त केलं.