गोंदियामध्ये चिखलाने माखलेल्या रस्त्यावरून भरधाव एसटी घसरुन झालेल्या अपघातात पाच प्रवासी किरकोळ जखमी झालेत. आज सकाळी 7 वाजण्याच्या सुमारास ही घटना घडली. मलपुरी ते गराडा दरम्यान रस्त्यावर पसरलेल्या चिखलामुळे ही बस रस्त्यावरून घसरू लागली. चालकानं वेळीच कसंबसं नियंत्रण मिळवल्यानं ही गाडी रस्त्यावरून उतरली. यात ५ प्रवासी जखमी झाले. मिळालेल्या माहितीनुसार, तिरोडा आगाराची एमएच ४०–९८७४ या क्रमांकाची एसटी बस आपल्या पहिली फेरीसाठी सुकडीहून तिरोड्याकडं निघाली होती. पण मलपुरी ते गराडा दरम्यान रस्त्यावर पसरलेल्या चिखलामुळे ही बस घसरली. यात राज बिसेन (वय १३, राहणार बाळापूर), समुर बिसेन (१३, डोंगरगाव), तारेंद्र रहांगडाले (१३, डोंगरगाव), हिमानी उके (१३, सुकडी) व अन्य एक असे पाच जण जखमी झाले. यावेळी एसटीत सुमारे 35 प्रवासी प्रवास करीत होते. दरम्यान अपघाताबाबत एस टी आगाराला माहिती देऊन देखील 2 तासांपर्यंत मदतीसाठी वाहन पाठविण्यात आले नव्हते. त्यामुळे प्रवाशांनी तीव्र संताप व्यक्त केला.