18 January 2018

News Flash

शिक्षकांचा ऑनलाइन कामावर बहिष्कार

ऑनलाइन कामांमुळे मन:स्थिती बिघडली

अकोले, वार्ताहर | Updated: September 17, 2017 3:19 AM

शिक्षण विभागाच्या अधिकृत व्हॅट्सअ‍ॅप ग्रुपमधून बाहेर पडून अकोल्यातील प्राथमिक व माध्यमिक शिक्षकांनी ऑनलाइनच्या कामावर बहिष्कार टाकला. 

अकोल्यातील शिक्षकांनी शिक्षण विभागाच्या ऑनलाइन कामावर बहिष्कार टाकला आहे. पंचायत समिती परिसरात झालेल्या सभेत हे शिक्षक सामुदायिकरीत्या शिक्षण विभागाच्या अधिकृत ‘व्हॉट्सअ‍ॅप’ गटामधून बाहेर पडले. ऑनलाइन कामासाठी स्वतंत्र यंत्रणा निर्माण करावी अशी या शिक्षकांची मागणी आहे.

संगणक प्रणाली वापरून शिक्षण विभागाची विविध प्रकारची ऑनलाइन प्रशासकीय कामे करताना शिक्षकांचा शिकवण्याचा प्रचंड वेळ वाया जातो. त्याचा मुलांच्या शिकण्यावर, शिकवण्यावर आणि पर्यायाने शाळांच्या शैक्षणिक गुणवत्तेवर प्रतिकूल परिणाम होतो. म्हणून यापुढे आम्ही अशी ऑनलाइन कामे करणार नाही, असे सांगण्यासाठी आज, शनिवारी पंचायत समितीसमोर प्राथमिक, माध्यमिक शिक्षक संघटनांच्या समन्वय समितीची सभा झाली. सुमारे पाचशे शिक्षक, मुख्याध्यापक या सभेसाठी जमले होते.

ऑनलाइन कामांना विरोध नाही, मात्र त्यासाठी आर्थिक तरतूद करून स्वतंत्र यंत्रणा अस्तित्वात आणावी. प्रगत शैक्षिणक महाराष्ट्र अंतर्गत पटसंख्येइतक्या उत्तररपत्रिका पुरवाव्यात, लोकसहभागाची सक्ती करू नये, प्रशासकीय आदेश व्हॉट्सअ‍ॅपवरून न देता लेखी वा तोंडी कळवावेत, सरकारी शाळांना सवलतीच्या दरात वीज द्यावी, फेसबुक, ट्विटर वापरायची सक्ती करू नये, शासकीय उपक्रमात सेवावर्ग केलेल्या शिक्षकांच्या जागी तातडीने शिक्षक नेमावेत आदी मागण्या करण्यात आल्या. तहसीलदार महेश कांबळे व प्रभारी गटविकास अधिकारी सचिन कोष्टी यांना निवेदने देण्यात आली.

ऑनलाइन कामांनी गांजलेले शिक्षक केंद्र आणि तालुका पातळीवरील व्हॉट्सअ‍ॅप ग्रुपमधून सभास्थानीच बाहेर पडले. यापुढे आम्ही कोणत्याही प्रकारची ऑनलाइन कामे करणार नसल्याचे शिक्षक आणि मुख्याध्यापकांनी या वेळी ठामपणाने सांगितले. आम्हाला फक्त मुलांना शिकवू द्या, अशी हाक या वेळी जमलेल्या शिक्षकांनी दिली. अनिल मोहिते यांनी प्रास्ताविक केले. भास्कर कानवडे, सुनील धुमाळ, विठ्ठल म्हशाळ, भाऊसाहेब चासकर, सुनीता रूपवते यांची या वेळी भाषणे झाली.

ऑनलाइन कामांमुळे मन:स्थिती बिघडली

प्रशासनाकडून सतत ऑनलाइन कामांचा तगादा लावल्याने, कारवाईचा बडगा उगारला जात असल्याने शिक्षक आणि मुख्याध्यापक प्रचंड तणावाखाली वावरत आहेत. त्यातून बीपी, मधुमेहासारखे आजार जडले असून तणावाखाली वाहने चालवताना अपघात होऊन, काही शिक्षक, मुख्याध्यापकांचा दुर्दैवी मृत्यू झाल्याची सल सुनीता रूपवते यांनी उदाहरणासह बोलून दाखवली. तेव्हा सगळेच उपस्थित हेलावले.

First Published on September 17, 2017 3:19 am

Web Title: teachers boycott online work in akola
  1. RAJKUMAR DHAWANDKAR
    Sep 20, 2017 at 4:52 pm
    आज बहुतांशी भागामध्ये जिल्हा परिषदेच्या शाळा आहेत .प्रतेक शाळेवर मुख्याध्यापक पद नाही.मोजक्या शाळेमध्ये हे पद आहेत.शाळेला हल्ली ऑफिसचे रूप आले आहे.शाळेच्या वरिष्ठ शिक्षकाकडे मुख्याध्यापकाचा पदभार असतो.हल्ली वरिष्ट स्तरावरून दिवस रात्री अचानक केंव्हाही संदेश येतात .कोणतेही काम आत्ता आणि ताबडतोबच करण्याचा आदेश असतो .मुख्याध्यापक हा फक्त मुख्याध्यापक नाही तर त्याच्याकडे वर्गाचीही जबाबदारी असते .एकट्या मुख्याध्यापकाला तीन तेचार कार्माच्यार्याचे काम करावे लागते.त्यामुळे तो मानसिक तणावाखाली आहे .ते काय शाळेचे नियोजन लाऊ शकतील .लेखी कामे करण्या साठी वेगळे एक पद असायला पाहिजे आणि त्याने शाळेवर येऊन स्वतः लिहून नेले पाहिजे .पण असे होत नाही.त्यामुळे गुणवत्ता खाली गेली आहे. व सर्व लेखी कामे मुख्याध्यापकांना सांगून मोकळे होतात .मग शिकवायला वेळ कुठून मिळणार .मुख्याध्यापक हा लिपिक,चेप्रशी ,वर्गशिक्षक .संगणक ऑपरेटर तो हि दिवस रात्र काम करतो एकट्या मुख्याध्यापकावर हा अन्याय होत आहे . त्यामुळे याचा विचार व्हायला पाहिजे .
    Reply
    1. U
      ulhas chaudhari
      Sep 17, 2017 at 9:40 am
      गेल्या काही वर्षात शिक्षण क्षेत्रात आमूलाग्र बदल झालेत , काही बदल स्वागतार्ह आहेत ,परंतु शिक्षक वर्गा कडून विद्यार्थ्याला शिकवण्या व्यतिरिक्त इतर कोणतेही काम करून घ्यायला नको हे तितकेच सत्त्य आहे . आणि संपूर्ण देशात एकच शिक्षण पद्धत असावी फक्त प्रत्येक राज्याची मूळ भाषा सक्तीने असावी . आज स्पर्धात्मक परीक्षांचा भडीमार होतोय ,स्पर्धात्मक परीक्षां विद्यार्थ्यांना स्वैच्छिक असाव्या , सक्ती करू नये या स्पर्धात्मक परीक्षांच्या तयारीसाठी प्रभारी निपुण शिक्षकांच्या नियुक्त्या कराव्या ज्यामुळे नियमित अभ्यासक्रम शिकविणाऱ्या शिक्षकांवर अतिरिक्त ताण येणार नाही .व अभ्यासक्रम वेळेत पूर्ण होईल . प्रशासकीय आदेश व्हॉट्सअ‍ॅपवरून द्या त्यामुळे संदेश वाहनाचा वेल वाचेल पण देतांना तारीख आदेश क्रमांक अवश्य द्यावा . व आदेश संध्याकाळी ५ च्या आत द्यावेत .आजकाल काही प्राचार्य आपल्या शिक्षक वर्गाला ग्रुप मधून कधीही सूचना देतांना आढळून आले आहेत त्यामुळे शिक्षकाचे कौटुंबिक जीवन संपुष्टात येत आहे ,शिक्षकांवर मानसिक ताण वाढत आहे ,शिक्षक मानसिक स्वस्थ नशेल तर तो विद्यार्थ्यांचा सर्वांगीण विकास कसा करणार ."
      Reply