सोलापुरात आज करोनाबाधित नवे १८ रूग्ण आढळून आले. तर पाच वृध्दांचा मृत्यू झाला. गेल्या पाच दिवसांत रूग्णसंख्या १२७ तर मृतांची संख्या २१ ने वाढली आहे. आज करोनाशी संबंधित १२० चाचणी अहवाल प्राप्त होऊन त्यापैकी २८ अहवाल पॉझिटिव्ह निघाले. यात ८ महिलांचा समावेश आहे. तर दोन महिलांसह पाच वृध्दांचे बळी गेले आहेत. आतापर्यंत रूग्णांची संख्या ५८३ झाली असून यात ३२३ पुरूष आणि ३६० महिलांचा समावेश आहे. तर आतापर्यंत बळी गेलेल्यांची संख्याही पाचने वाढून ५१ वर पोहोचली आहे. दरम्यान, आज रूग्णालयातून करोनामुक्त होऊन पाच रूग्ण ठणठणीत बरे होऊन घरी परतले. त्यामुळे करोनामुक्त व्यक्तींची एकूण संख्या २५४ झाली आहे. सध्या रूग्णालयात २७८ रूग्ण उपचार घेत आहेत. करोनाचा फैलाव वरचेवर वाढत असताना मागील पाच दिवसांत रूग्णांचा आकडा आणखी पुढे गेला आहे. २० मे रोजी करोनाबाधितांची संख्या ४५१ होती. त्यात १२७ रूग्णांची भर पडली. तर मृतांचा आकडाही ३० वरून ५१ वर गेला आहे.
