पेंच व्याघ्र प्रकल्पातील पूर्व पेंच वनक्षेत्रातील सलामा वनक्षेत्रात शनिवारी दुपारच्या सुमारास वाघाचा मृतदेह मिळाल्याने खळबळ उडाली. गस्तीदरम्यान ही घटना उघडकीस आली. वनरक्षकांनी ही माहिती वरिष्ठांना देताच पेंच व्याघ्रप्रकल्पाचा चमू घटनास्थळी पोहचला. घटनेचा पंचनामा सुरू असून शवविच्छेदनानंतरच मृत्यूचे नेमके कारण कळेल. प्रथमदर्शनी अपघाती मृत्यूची शंका व्यक्त करण्यात येत आहे. या व्याघ्रप्रकल्पालगत राष्ट्रीय महामार्ग ४४ असल्याने वाघ, बिबट्यासह वन्यप्राणी मृत्युमुखी पडण्याच्या घटना घडतात. मात्र टाळेबंदीच्या काळात वाहतूक मंदावली असतानाही अपघाती मृत्यूमुळे आश्चर्य व्यक्त करण्यात येत आहे.
