पुणे बँगलोर महामार्गावर असलेल्या खांबाटकी बोगद्याजवळच्या एस वळणावर शुक्रवारी पहाटे साडेपाचच्या सुमारास बोअर मारणारा ट्रक कठड्यास जोरदार धडकून उलटला. या अपघातात तीन जण जागीच ठार झाले. तर १० जण जखमी झाले आहेत. त्यापैकी तीन ते चारजण हे गंभीर जखमी आहेत. त्यांना उपचारांसाठी रुग्णालयात दाखल करण्यात आलं आहे. वाई येथून खंडाळा येथे बोअर मारण्यासाठी ट्रक क्रमांक (एमएच- ए एल- ४४६६) हा जात असताना हा अपघात झाला . पहाटे साडेपाचच्या सुमारास बोअर मारणारा ट्रक कठड्यास एस वळणावर जोरदार धडकला . ट्रकमध्ये चालकासह १३ कामगार होते . भरधाव वेगामुळे एस वळणावर चालकाचे वाहनावरील नियंत्रण सुटल्याने ट्रक बाजूच्या सिमेंट कठड्याला धडकून उलटला. ट्रकमधील लोखंडी पाईप व कठड्याच्या मध्ये अडकून सर्व कामगार जखमी झाले . तीन जण गाडीखाली सापडल्याने जागीच ठार झाले . खंडाळा पोलीस , महामार्ग पोलीस यांनी क्रेनच्या साहाय्याने ट्रक बाजूला घेऊन मृत व जखमींना बाहेर काढले. जखमींना अधिक उपचारासाठी सातारा येथे हलवण्यात आले आहे.
